اعظم خان نگراں وزیراعلیٰ خیبرپختونخوا بن گئے

پشاور (نامہ نگار)اعظم خان کو بطور نگراں وزیرِ اعلی خیبر پختونخوا تقرری کے احکامات جاری کر دیے گئے۔گورنر خیبر پختون خوا غلام علی نے اعظم خان کی بطور نگراں وزیرِ اعلی تقرری کے احکامات جاری کر دیے۔واضح رہے کہ گزشتہ روز خیبر پختون خوا حکومت اور اپوزیشن میں نگراں وزیرِ اعلی کے لیے اعظم خان کے نام پر اتفاق ہو گیا تھا۔اپوزیشن لیڈر اکرم خان درانی کا کہنا تھا کہ نگراں وزیرِ اعلی کے لیے ہمارے متفقہ امیدوار اعظم خان ہیں، ایسے شخص کا چناو کیا ہے جو سب کو قابلِ قبول ہیں۔ان کا کہنا تھا کہ نگراں وزیرِ اعلی کا فیصلہ نہ کرتے تو لوگ سمجھتے کہ یہ ابھی بھی ضد پر ہیں، تاریخ میں پہلی بار متفقہ طور پر نگراں وزیرِ اعلی کے نام پر اتفاق ہوا ہے۔عوامی نیشنل پارٹی کے رہنما ایمل ولی کا کہنا تھا کہ اے این پی اعظم خان کو نگران وزیرِ اعلی بنانے کے فیصلے کا خیر مقدم کرتی ہے۔انہوں نے کہا تھا کہ امید ہے کہ اعظم خان صوبے کا نظام بہترین طور پر چلائیں گے۔اعظم خان ماضی چیف سیکریٹری سمیت دیگر عہدوں پر رہ چکے ہیں، وہ سابق نگراں وفاقی وزیر بھی رہے ہیں۔اعظم خان پیٹرولیم اور مذہبی امور کی وزارتوں کے وفاقی سیکریٹری بھی رہے ہیں۔انہوں نے لنکنز اِن لندن سے بار ایٹ لا کی ڈگری حاصل کی تھی۔