ایم ایس دھونی پاکستانی کھانوں کے گن گانے لگے

بھارتی کرکٹ ٹیم کے سابق کپتان مہندر سنگھ (ایم ایس) دھونی آج بھی پاکستانی کھانوں کے مداح ہیں۔سوشل میڈیا پر بھارت کے سابق کپتان ایم ایس دھونی کی پاکستانی کھانوں کی تعریف پر مبنی ایک ویڈیو وائرل ہے ۔ویڈیو میں وہ پاکستانی کھانوں کی تعریف کرتے ہوئے ایک مداح کو مشورہ دے رہے ہیں ، بھارتی کرکٹ ٹیم کے سابق کپتان پاکستانی کھانوں کا ذکر کرتے ہوئے کہتے ہیں کہ ”کھانا کھانے کے لیے ایک بار پاکستان ضرور جائیں، وہاں بہترین کھانا ہے ”۔انہوں نے بتایا کہ پاکستان میں جب بھی گیا، وہاں کا کھانا ہمیشہ سب سے اچھا پایا اور میں پاکستانی کھانوں کا مداح بن گیا ہوں۔یاد رہے کہ یہ پہلی بار نہیں جب دھونی نے پاکستانی کھانوں کی کھل کر تعریف کی ہو بلکہ اس سے قبل بھی کئی بار وہ اس کا برملا اعتراف کر چکے ہیں۔ایم ایس دھونی 2006ء اور 2008ء میں پاکستان کا دورہ کرچکے ہیں، انہوں نے اس دوران پاکستان میں 3 ٹیسٹ اور 11 ایک روز میچز کھیلے تھے۔