جیل بھرو تحریک ‘PTIکوپک اینڈ ڈراپ سروس کی پیشکش

کراچی (بیوروچیف)وزیر اطلاعات سندھ شرجیل ممین نے جیل بھرو تحریک میں پی ٹی آئی کو پیشکش کر دی۔ وزیر اطلاعات سندھ شرجیل میمن نے اپنے بیان میں کہا ہے کہ جیل بھرو تحریک کی کامیابی کیلئے پوری قوم دعا گو ہے،افسوس ہے کہ تحریک کا اعلان کرنے والوں کی ٹانگیں کانپ رہی ہیں۔پی ٹی آئی کی سندھ میں جیل بھرو تحریک کیلئے بھرپور تیار ہیں۔انہوں نے پی ٹی آئی کو پیشکش کرتے ہوئے کہا کہ تحریک انصاف والے صرف جیل جانے کیلئے نام لکھوائیں،فری پک اینڈ ڈراپ سروس بھی مہیا کر سکتے ہیں۔ دوسری جانب پی ٹی آئی رہنما فواد چوہدری کا کہنا ہے کہ تحریک انصاف کے 200 سے زیادہ سیاسی کارکن مختلف جیلوں میں قید و بند کی صعوبتیں برداشت کر رہے ہیں۔ان رہنماؤں میں شاہ محمود قریشی،اسد عمر اور صف اوّل کی دیگر قیادت شامل ہے۔فواد چوہدری نے کہا کہ زلفی بخاری،صداقت عباسی اور فیاض الحسن چوہان سمیت دیگر رہنماؤں کو رات گئے شاہ پور جیل منتقل کیا گیا۔ ”جیل بھرو زندان بھرو تحریک ” کا مقصد عوام کے سیاسی اور معاشی حقوق کیلئے جدوجہد کا شعور ہے،فسطائی حکمرانوں سے آزادی ہماری منزل ہے۔ علاوہ ازیں رہنما پی ٹی آئی نے کہا کہ پی ڈی ایم حکومت نے عدلیہ کیخلاف محاذ کھول دیا۔مریم نواز کا خیال ہے کہ عدلیہ کو دباؤ میں لے آئیں گی،اپنی کارکردگی کو دوسروں کو گالیاں دے کر چھپانا بے ہودہ اسکیم ہیں۔ پی ڈی ایم کی حکومت عدلیہ کے ساتھ محاذ آرائی کیلئے تیار ہو گئی ہے،مریم نواز بیانات کے ذریعے عدلیہ کو دباومیں لانے کی کوشش کررہی ہیں۔ انکا کہنا تھا کہ دوسرو ں کو برابھلا کہہ کر یہ اپنی کارکردگی سے منہ چھپانا چاہتے ہیں،پہلے بھی مریم نواز اینڈ کمپنی نے عدلیہ کیخلاف محاذ کھولا تھا۔جن ججز نے قاسم سوری کی رولنگ کو کالعدم قرار دیا تو وہ بھی اس بینچ کا حصہ ہیں،ڈپٹی اسپیکرکی رولنگ کالعدم قرار دینے کیخلاف پی ٹی آئی نے کوئی محاذ نہیں کھولا۔