مدارس رجسٹریشن پر تحفظات دور کرینگے’ بلاول بھٹو

اسلام آباد(بیوروچیف )پاکستان پیپلز پارٹی (پی پی پی) کے چیئرمین بلاول بھٹو زرداری سے ملاقات میں مولانا فضل الرحمان نے مدارس رجسٹریشن بل پر صدر مملکت کے دستخط نہ ہونے پر تشویش کا اظہار کردیا۔اسلام آباد میں بلاول بھٹو زرداری وفد کی صورت میں ملاقات کے لیے مولانا فضل الرحمان کی رہائش پہنچے۔پی پی چیئرمین کے ہمراہ ملاقات میں راجا پرویز اشرف اور قمر زمان کائرہ بھی موجود تھے، اس دوران ملکی سیاسی صورتحال سمیت دیگر امور پر تبادلہ خیال کیا گیا۔ملاقات میں مولانا فضل الرحمان نے مدارس رجسٹریشن بل پر صدر مملکت آصف علی زرداری کے دستخط نہ ہونے پر تشویش کا اظہار کیا اور کہا کہ مدارس رجسٹریشن بل پر دونوں ایوانوں سے منظوری کے باوجود صدر کے دستخط کیوں نہیں ہوئے۔پی پی چیئرمین نے جے یو آئی سربراہ کو یقین دہانی کرائی کہ وہ مدارس رجسٹریشن بل پردستخط نہ ہونے پرحکومت سے بات کریں گے۔ملاقات کے بعد میڈیا سے گفتگو کرتے ہوئے سابق وزیراعظم راجہ پرویز اشرف نے کہاکہ مولانا کے تحفظات دور ہوگئے؟ اچھی ملاقات رہی ہے،اس موقع پر عبدالغفور حیدری نے کہاکہ مدارس رجسٹریشن بل پر صدر دستخط کرینگے،پیپلزپارٹی نے یقین دہانی کرا دی،صرف اس موضوع پر بات چیت ہوئی۔سینیٹر کامران مرتضی نے کہاکہ ہم نے گپ شپ کی ہے اچھی چائے پی ہے،صدر پیپلز کا نہیں ریاست کا صدر ہوتا ہے۔مدارس کی رجسٹریشن پر بلاول بھٹوزرداری پہلے بھی ہمارے ساتھ تھے اب بھی ہمارے ساتھ ہیں۔