پل کوریاں کے قریب ویگن کی زد میں آکر موٹر سائیکل سوار جاں بحق

فیصل آباد (سٹاف رپورٹر) تھانہ ڈی ٹائپ کالونی کے علاقہ سمندری روڈ پر پل کوریاں کے قریب یوٹرن لیتے ہوئے ویگن کی زد میں آ کر موٹرسائیکل سوار جاں بحق’ دوسرا بری طرح زخمی ہو گیا، پولیس نے نعش تحویل میں لیکر ضروری کارروائی کے بعد ورثاء کے حوالے کر دی۔ بتایا جاتا ہے کہ سیٹلائٹ ٹائون کا رہائشی محمد شریف ولد معراج دین اپنے عزیز 33 سالہ فرحان کے ہمراہ موٹرسائیکل پر گھر جا رہا تھا جب وہ سمندری روڈ پر پل کوریاں کے قریب پہنچے تو تیز رفتار ویگن نے یوٹرن لیا تو وہ اسکی زد میں آکر گر پڑے اور بری طرح زخمی ہو گئے، حادثہ کی اطلاع ملتے ہی ریسکیو1122 کی ٹیم موقع پر پہنچی تو 45 سالہ محمد شریف ولد معراج دین زخموں کی تاب نہ لاتے ہوئے دم توڑ چکا تھا جبکہ فرحان کو طبی امداد فراہم کرتے ہوئے ہسپتال پہنچایا، پولیس نے نعش قبضہ میں لیکر حادثے کے مرتکب ڈرائیور کی تلاش شروع کر دی ہے۔