کسی قسم کا سکیورٹی لیپس برداشت نہیں کیا جائیگا ‘ وزیراعظم شہباز شریف

اسلام آباد (بیوروچیف) وزیراعظم شہباز شریف کی زیر صدارت امن و امان کی صورت حال پر اہم اجلاس ہوا ۔اجلاس سے خطاب کرتے ہوئے وزیراعظم نے کہاکہ کسی قسم کا سیکورٹی لیپس برداشت نہیں کیا جائے گا، قانون نافذ کرنے والے اداروں کو جدید ہتھیاروں اور سامان سے لیس کیا جائے،امن و امان کے حوالے سے وفاق اور صوبوں میں رابطوں اور ہم آہنگی کو بہتر کیا جائے۔ وزیراعظم نے وزیر داخلہ رانا ثناء اللہ کو چاروں صوبوں کا دورہ کرنے کی ہدایت کر دی ۔وزیراعظم نے تمام صوبوں میں کاؤنٹر ٹیررازم ڈیپارٹمنٹس کی استعداد کار میں بہتری کے لیے اقدامات کرنے کی ہدایت کر دی۔وزیراعظم نے کہا کہ ایپکس کمیٹی کے فیصلوں پر عملدرآمد کیا جائے ۔اجلاس میں وزیر داخلہ رانا ثنا اللہ، معاونین خصوصی سید طارق فاطمی، جہان زیب خان کی شرکت کی ۔چاروں صوبوں، گلگت بلتستان، آزاد کشمیر کے چیف سیکرٹریز، چیف کمشنر اسلام آبادبھی شریک ہو ئے چاروں صوبوں، گلگت بلتستان، آزاد کشمیر، اسلام آباد کے آئی جیز پولیس اور متعلقہ سرکاری افسران نے بھی اجلاس میں شرکت کی۔