ہمارے دور حکومت میں عوام خوشحال تھی’نواز شریف

لندن (مانیٹرنگ ڈیسک)مسلم لیگ(ن) کے قائد میاں محمد نواز شریف نے کہاہے کہ میرے چار سال کا موازنہ عمران خان کے چار سالوں سے کیا جائے پھر قوم فیصلہ کرے کہ کس کے دور حکومت میں حالات اچھے تھے روٹی چینی گھی آٹا بجلی پیٹرول کس کے دور میں سستا تھاڈھونڈنا کوئی مشکل نہیں جواب قوم کو مل جائیگا، نوازشریف نے پرویز الہی کی صدر سپریم کورٹ بار عابد زبیری سے گفتگو کی آڈیو لیکس کا معاملہ سپریم جوڈیشل کونسل میں بھیجنے کا مطالبہ کر دیا۔لندن میں صحافیوں سے گفتگومیں نواز شریف نے کہاپرویز الہی کی جسٹس مظاہر نقوی سے متعلق آڈیو لیکس بڑا سنگین معاملہ ہے اس کا ہر سطح پر نوٹس لیا جانا چاہیے، اعلی عدالت کے جج کے بارے میں اس سے زیادہ سنگین باتیں کیا ہو سکتی ہیں؟ یہ معاملہ بھی سپریم جوڈیشل کونسل کو نہیں بھیجنا تو پھر کیا کرنا ہے؟ اگر ان کا نام نہیں بھیجنا تو میرا نام بھیج دیں،اے وی فیرمیرے تے پادیو پہلے بھی مجھ پر اتنے الزامات لگائے گئے ہیں ایک نیا الزام بھی لگ جائے تو کیا فرق پڑتا ہے، انہی کرداروں کی وجہ سے آج پاکستان اس مقام پر پہنچا ہے، ان لوگوں کی وجہ سے پاکستان لڑھک رہا ہے اور سر کے بل گر رہا ہے،ایسے کرداروں کو کبھی معاف نہیں کرنا چاہیے وہ 5 کردار جنہوں نے پاکستان کو یہاں تک پہنچایا ہے انکو بھی معافی نہیں ملنی چاہیے یہ کوئی میرا ذاتی ایجنڈا نہیں ہے قوم کے ساتھ ظلم و زیادتی ہوئی۔