صدر علوی نئے وزیراعظم سے حلف نہیں لے سکیں گے

اسلام آباد (بیوروچیف) نیاصدارتی انتخاب وزیراعظم کے انتخاب کے فوری بعد ہوگا جس کے نتیجے میں صدر مملکت عارف علوی نئے وزیراعظم سے حلف لینے کے اعزاز سے محروم ہوجائیں گے اور ان کے جانشین کو یہ ذمہ داری ادا کرنا پڑے گی۔ نئے منتخب ارکان اسمبلی 26 فروری کو اپنے عہدے کا حلف اٹھائیں گے جو کہ افتتاحی سیشن کیلیے مقررہ مہلت سے تین دن قبل ہوگی۔ موجودہ ارکان اسمبلی جو نئی اسمبلی کا حلف اٹھائیں گے وہ اگر صوبائی اسمبلیوں کے ارکان بھی منتخب ہوئے ہیں تو وہ اس کے بعد رکن نہیں رہیں گے۔اعلی پارلیمانی ذرائع نے بتایا ہے کہ سینیٹ کے 53 ارکان ، چیئرمین سینیٹ اور ڈپٹی چیئرمین سینیٹ کیلیے اور بالآخر صدرپاکستان کیلیے انتخاب کو 8 مارچ تک مکمل کرنا ہوگا۔ ذرائع کے مطابق اگر صدارتی انتخاب ایک ہفتہ پہلیکرالیاجائے تو موجودہ صدر عارف علوی کی جگہ نیا صدر نئے وزیراعظم سے حلف لے گا۔ ذرائع نے بتایا ہے کہ جونہی قومی اور صوبائی اسمبلیوں کیارکان حلف اتھا لیں گے وہ ارکان سینیٹ کے انتخاب کیلیے اور پھر صدارتی انتخاب کیلیے ووٹ کاسٹ کر سکیں گے۔ ذرائع نے اس کا شیڈول دیتے ہوئے کہا ہے کہ ارکان اسمبلی کو 18 فروری تک اپنے اخراجات کی تفصیلات جمع کراناہوں گی اور منتخب ارکان کے متعلق اعلامیہ 22 فروری تک جاری کر دیاجائیگا۔ یہاں اس امرکا تذکرہ ضروری ہے کہ صدرعارف علوی نے خرابی صحت کے عذر کے تحت وزیراعظم شہبازشریف سے 14 اگست 2022 کو حلف لینے سے انکار کر دیا تھا اور یہ ذمہ داری چیئرمین سینیٹ نے نبھائی تھی۔ ذرائع نے یہ بھی یاددلایا کہ نگراں وزیراعظم اورکابینہ کے ارکان نئے وزیراعظم کی حلف برداری تک اپنے متعلقہ عہدوں پر موجود رہیں گے۔