10ہزار طلبہ کو بلا سود الیکٹرک بائیکس دینے کی منظوری

لاہور (بیوروچیف)پنجاب کابینہ نے طلبا و طالبات کو آسان شرائط پربلاسود الیکٹرک بائیکس دینے کی منظوری دید ی۔وزیراعلی پنجاب محسن نقوی کی زیر صدارت صوبائی کابینہ کا 40واں اجلاس ہوا جس میں صوبائی وزرا، مشیران، چیف سیکرٹری،ایڈووکیٹ جنرل پنجاب، انسپکٹر جنرل پولیس، چیئرمین پی اینڈ ڈی بورڈ، سینئر ممبر بورڈ آف ریونیو اور متعلقہ محکموں کے سیکرٹریز شریک ہوئے۔ اجلاس میں 8فروری کے عام ا نتخابات کے پر امن انعقاد پر پولیس، انتظامیہ اور قانون نافذ کرنے والے اداروں کو خراج تحسین پیش کیا گیا۔اجلاس کے دوران گفتگو کرتے ہوئے وزیراعلی محسن نقوی کا کہنا تھا کہ پنجاب بھر میں پرامن ماحول میں عام انتخابات کا مرحلہ مکمل ہوا جس پر چیف سیکرٹری، انسپکٹر جنرل پولیس،انتظامیہ اور فیلڈ فارمیشنز کو مبارکباد دیتا ہوں، نگران حکومت نے قومی ذمہ داری کو احسن طریقے سے ادا کیا۔محسن نقوی نے کہا کہ ووٹرز نے پرامن ماحول میں حق رائے دہی استعمال کیا اور آزادانہ ووٹنگ سے اپنے نمائندے منتخب کئے،ہم جس مقصد کے لئے آئے تھے اس میں سرخرو رہے، مختصر مدت میں عوام کو ریلیف دینے کے لئے جو کر سکتے تھے وہ کرنے کی پوری کوشش کی۔انہوں نے مزید کہا کہ پوری ٹیم کا ضمیر مطمئن ہے