کاغذات نامزدگی مسترد ہونے کیخلاف بڑی تعداد میں اپیلیں دائر

اسلام آباد، فیصل آباد (بیوروچیف، سٹاف رپورٹر) ریٹرننگ افسران کے فیصلوں کے خلاف الیکشن ٹریبونل میں اپیلیں دائر ہونا شروع ہو گئیں۔الیکشن شیڈول کے مطابق امیدوار الیکشن ٹریبونل میں 3 دن تک اپیلیں دائر کر سکتے ہیں۔اپیلوں پر الیکشن ٹریبونل 10 جنوری کو فیصلے جاری کرے گا۔کراچی میں رہنما پی ٹی آئی فردوس شمیم نقوی اور آزاد امیدوار مظہر جونیجو ایڈووکیٹ نے اپیلیں دائر کر دیں۔فردوس شمیم نقوی کے این اے 236، آزاد امیدوار مظہر جونیجو کے پی ایس 86 پر کاغذاتِ نامزدگی مسترد ہوئے ہیں۔ادھر راولپنڈی کے مختلف حلقوں میں بھی امیدواروں کے کاغذاتِ نامزدگی مسترد ہونے کے خلاف امیدوار آج لاہور ہائی کورٹ پنڈی بینچ میں اپیلیں دائر کریں گے۔راولپنڈی میں کاغذاتِ نامزدگی مسترد ہونے والے کسی امیدوار نے تاحال کوئی اپیل دائر نہیں کی ہے۔جسٹس جواد حسن اور جسٹس مرزا وقاص روف پر مشتمل الیکشن ٹریبونل اپیلوں کی سماعت کر یگا۔اس موقع پر لاہور ہائی کورٹ پنڈی بینچ کے اطراف پولیس کی بھاری نفری تعینات کر دی گئی ہے۔ہائی کورٹ آنے والے راستوں پر سول کپڑوں میں ملبوس اہلکار بھی تعینات کر دیے گئے ہیں۔وفاقی دارالحکومت اسلام آباد میں عام انتخابات کے لیے کاغذاتِ نامزدگی سے متعلق اپیلوں کی سماعت آج سے ہو گی۔اسلام آباد ہائی کورٹ کے 2 ججز الیکشن ایپلیٹ ٹریبونل میں آج سے اپیلیں سنیں گے، علاوہ ازیں ریٹرننگ آفیسرز کے فیصلوں کیخلاف امیدواروں کی اپیلوں کی سماعت کیلئے بطور ایپلٹ ٹربیونل کیلئے ہائیکورٹ کے جج تعینات کر دیئے گئے۔ حالیہ انتخابات 2024ء کے دوران فیصل آباد اور سرگودھا ڈویژن کیلئے مسٹر جسٹس اسجد جاوید کو مقرر کیا گیا ہے۔ جو کہ مذکورہ دونوں ڈویژن کے ایسے امیدوار جن کے کاغذات نامزدگی ریٹرننگ آفیسرز نے مسترد کر دیئے ہیں وہ لاہور ہائیکورٹ مسٹر جسٹس اسجد جاوید کے پاس اپیل کر سکیں گے اور 3 جنوری تک کاغذات مسترد ہونے والے امیدوار کیس دائر کر سکیں گے۔ 10جنوری تک مسترد شدہ کاغذات کا فیصلہ کیا جائے گا۔