PTI سے ”بلا ” واپس لینے پر پرچم کے تاجروں کونقصان کا ڈر

اسلام آباد(بیوروچیف)سیاسی جماعتوں کے پرچم تیار اور فروخت کرنے والے تاجروں کو تحریکِ انصاف سے بلّے کا نشان واپس لیے جانے سے بھاری نقصان ہونے کی فکر لاحق ہو گئی۔ملک کے ایک بڑے پرچم ساز ادارے کے چیف ایگزیکٹیو آفیسر نے کہا کہ ہم ہمیشہ پارٹی پرچموں کا ذخیرہ رکھتے ہیں، ہمارے پاس تقریباً تمام سیاسی جماعتوں کے پرچم تیار ہیں۔ان کا کہنا تھا کہ ہمارے پاس پی ٹی آئی کے تقریباً 50 ہزار پرچم موجود ہیں جن پر اس جماعت کا انتخابی نشان ”کرکٹ بیٹ” موجود ہے اور اگر پارٹی کو سپریم کورٹ سے ریلیف نہ ملا تو ہمیں مالی نقصان ہو گا۔انہوں نے کہا کہ ہم نے 3 بڑی سیاسی جماعتوں پیپلز پارٹی، پاکستان مسلم لیگ نواز اور پی ٹی آئی کے پرچم تیار کیے ہیں، خدا ناخواستہ اگر انہیں بیٹ الاٹ نہ کیا گیا تو ہمارا بہت بڑا نقصان ہو گا۔ایک پرچم فروش نے بتایا کہ ہم نے پی ٹی آئی کے مختلف سائز کے پرچموں کا ذخیرہ رکھا ہوا ہے اور اگر انہیں بلّے کا انتخابی نشان نہ دیا گیا تو ہمیں نقصان اٹھانا پڑے گا۔ایک اور پرچم فروش نے بتایا کہ کچھ تاجروں کے پاس پی ٹی آئی کے 1 لاکھ سے زیادہ پرچموں کا ذخیرہ ہے جس میں انتخابی نشان کرکٹ بیٹ بنا ہوا ہے ۔تاجروں کے مطابق ایک پرچم کی قیمت 10 سے 500 روپے کے درمیان ہے جبکہ خصوصی درخواستوں پر بنائے گئے پرچم کی قیمت اس سے کہیں زیادہ ہے ۔