اندھا دھند فائرنگ سے کچہری بازار میدان جنگ بن گیا

فیصل آباد(سٹاف رپورٹر)فیصل آباد ہوٹل پر قبضے کیلئے ہونے والی فائرنگ سے علاقہ میدان جنگ بن گیا، پولیس روایتی بے حسی کا مظاہرہ کرتے ہوئے تاخیر سے پہنچی۔فیصل آباد کے علاقے کچہری بازار میں قائم ایک ہوٹل پر قبضے کیلئے کی جانے والی اندھا دھند فائرنگ سے علاقے میں خوف ہراس پھیل گیا۔جس جگہ یہ واقعہ پیش آیا وہ دفتر ایس پی لائل پورٹاؤن اور تھانہ سول لائن کے ساتھ ہی ہے لیکن اطلاع ملنے کے باوجود پولیس کافی تاخیر سے جائے وقوعہ پر پہنچی۔فائرنگ اس قدر شدید تھی کہ دکاندار جانیں بچانے کیلئے اپنی دکانیں کھلی چھوڑ کر وہاں سے بھاگ لیے، تاہم پولیس نے کاررروائی کرکے دو ملزمان کو گرفتار کرلیا۔مسلح حملہ آوروں نے پولیس اہلکاروں پر بھی تشدد کیا اور ایک زیرحراست ساتھی کو چھڑا کر لے گئے، ایک ملزم کاظم اسلحے سمیت گرفتار کرلیا گیا جسے تھانہ ریل بازار کی حوالات میں بند کردیا گیا ہے