آئی فون’ آئی پیڈ میں سکیورٹی خدشات

اسلام آباد (بیوروچیف) ایپل نے آئی فون اور آئی پیڈ میں سیکیورٹی کے سنگین خطرات کی اطلاع سامنے آنے کے بعد صارفین کو خبردار کر دیا۔ غیر ملکی خبر رساں ایجنسی کے مطابق کمپنی نے اپنے صارفین سے سیکیورٹی خدشات کو مدنظر رکھتے ہوئے نیا آئی او ایس پیچ ڈان لوڈ کرنے کی اپیل کی ہے۔ کمپنی کااس حوالے سے اپنے بیان میں کہنا ہے کہ اس اپیل کا مقصد صارفین کو ایک انتہائی نفیس سائبر حملے سے بچانا ہے۔ کمپنی کی جانب سے مزید بتایا گیاہے کہ سفاری اور آئی فون یا آئی پیڈ کے لیے بنائے گئے دیگر تمام انٹرنیٹ برازرز میں استعمال ہونے والے برازر انجن میں ایک خامی کی شناخت ہوئی ہے جسے CVE-2025-24201 کہا جاتا ہے۔ کمپنی نے بیان میں کہا ہے کہ ہیکرز نے اس خامی کو ایک کھلے دروازے کی طرح استعمال کیا،انہوں نے ایسی ویب سائٹس تخلیق کیں جو انہیں بہت آسانی سے صارفین کے ویب برازر تک رسائی فراہم کر سکتی ہیں۔