اسرائیل کی بمباری،خیموں میں آگ بھڑک اٹھی،20فلسطینی شہید

غزہ (مانیٹرنگ ڈیسک) اسرائیلی فوج کی غزہ کے المواصی پناہ گزین کیمپ پر بمباری کے نتیجے میں 24گھنٹوں کے دوران شہدا کی تعداد 50سے تجاوز کرگئی۔غیر ملکی خبر رساں ادارے کے مطابق غزہ کے المواصی پناہ گزین کیمپ میں فائرنگ سے بے گھر فلسطینیوں کے خیموں میں آگ لگ گئی جس کے نتیجے میں 20سے زائد فلسطینی شہید ہوگئے۔دوسری جانب غزہ پر اسرائیلی حملوں میں 24گھنٹوں کے دوران شہدا کی تعداد 50 سے تجاوزکرگئی ہے۔ادھر اسرائیلی وزیردفاع اسرائیل کاٹز نے کہاکہ حماس پربڑھتے دبا کے باعث غزہ میں جنگ بندی کے امکانات ہیں، امید ہے حماس کے ساتھ آئندہ مذاکرات میں جنگ بندی پر اتفاق ہوجائے گا۔مزید برآں لبنان جنگ بندی کے باوجود اسرائیلی فوج کے جنوبی لبنان میں فضائی حملے جا ری ہیں جس کے نتیجے میں مزید 12 افراد شہید ہوگئے ہیں۔اسرائیل نے لبنان کی مزاحمتی تنظیم حزب اللہ کے لانچنگ پیڈ کو نشانہ بنانے کا دعوی کیا ہے۔