الائیڈ ہسپتال میں شعبہ ریڈیالوجی کی تمام مشینیں فعال ہیں

فیصل آباد(سٹاف رپورٹر)پنجاب کے بڑے طبی مراکز میں شمار ہونیوالے الائیڈ ہسپتال ون کے شعبہ ریڈیالوجی کے سربراہ اور فیصل آباد میڈ یکل یونیورسٹی کے پروفیسر ڈاکٹر عاصم شوکت نے کہا ہے کہ ایم ایس ڈاکٹر فہیم کی خصوصی توجہ سے شعبہ ریڈیالوجی کے تمام مشینیں فعال کر دی گئی ہیں۔ جدید ترین تشخیصی نظام کے ذریعے مریضوں کی خدمت جاری ہے۔ ہسپتال کی حالیہ رپورٹ کے مطابق، شعبہ ریڈیالوجی میں نصب جدید ترین مشینوں کے ذریعے نہ صرف فیصل آباد بلکہ پورے ڈویژن سے آنے والے مریضوں کو سستی اور معیاری سہولیات فراہم کی جا رہی ہیں۔ رواں ماہ کے اعداد و شمار ظاہر کرتے ہیں کہ شعبے نے کام کے بوجھ اور مریضوں کے رش کے باوجود تشخیص کے عمل کو انتہائی تیز اور شفاف بنا دیا ہے، جس کے باعث یومیہ بنیادوں پر سینکڑوں خاندان مستفید ہو رہے ہیں۔ ہسپتال میں موجود جدید ڈیجیٹل سسٹم کے تحت ماہانہ 15,000 سے زائد ایکسرے کیے جا رہے ہیں، جبکہ ایمرجنسی اور او پی ڈی کے مریضوں کے لیے یہ سہولت 24 گھنٹے میسر ہے۔ اسی طرح، حادثات اور سر کی چوٹوں کی فوری تشخیص کے لیے نصب جدید سٹی سکین (CT Scan) مشین کے ذریعے ماہانہ اوسطا 2,500 سے 3,000 مریضوں کے ٹیسٹ کیے جا رہے ہیں، جو کہ کسی بھی سرکاری ہسپتال کے لیے ایک بڑی کامیابی ہے۔ الٹراسانڈ کے شعبے میں بھی غیر معمولی پیش رفت دیکھنے میں آئی ہے، جہاں روزانہ کی بنیاد پر 400 سے زائد مریضوں کے الٹراسانڈ اور کلر ڈوپلر ٹیسٹ کیے جاتے ہیں، جن میں خواتین اور بچوں کی ایک بڑی تعداد شامل ہے۔