ایچ ون بی ویزا منسوخ ‘امریکہ کا بھارت کو کرارا جواب

واشنگٹن (مانیٹرنگ ڈیسک) امریکا کی جانب سے ہزاروں ایچ ون بی ویزا انٹرویوز اچانک منسوخ اور موخر کیے جانے پر بھارت نے باضابطہ ردعمل دیتے ہوئے اپنے تحفظات واشنگٹن کے سامنے رکھ دیے ہیں، جبکہ امریکی حکام نے اس اقدام کو قومی سلامتی سے جوڑ دیا ہے۔بھارتی وزارتِ خارجہ کے ترجمان نے ہفتہ وار بریفنگ میں بتایا کہ 15دسمبر کے بعد طے شدہ متعدد ایچ ون بی ویزا انٹرویوز کو مہینوں کے لیے موخر کر دیا گیا ہے، بعض کیسز میں نئی تاریخیں مئی 2026تک دے دی گئی ہیں۔ ترجمان کے مطابق حکومت کو ان بھارتی شہریوں کی جانب سے شکایات موصول ہوئیں جن کے انٹرویوز اچانک ری شیڈول کیے گئے۔بھارت کا کہنا ہے کہ اس معاملے پر امریکا میں اور نئی دہلی میں متعلقہ حکام کے سامنے خدشات اٹھائے جا چکے ہیں، تاہم ویزا پالیسی ہر ملک کا خودمختار معاملہ ہوتی ہے۔ اس کے باوجود بھارت نے کہا ہے کہ وہ اپنے شہریوں کو درپیش مشکلات کم کرنے کے لیے امریکا کے ساتھ رابطے میں رہے گا۔امریکی حکام کے مطابق انٹرویوز مخر کرنے کی وجہ ویزا درخواست گزاروں کے سوشل میڈیا اکائونٹس کی جانچ پڑتال ہے، جس کے تحت امیدواروں کو اپنی پروفائلز پبلک رکھنے کی ہدایت دی گئی ہے۔ امریکی محکمہ خارجہ کا کہنا ہے کہ ہر ویزا فیصلہ قومی سلامتی کے تناظر میں کیا جاتا ہے۔واضح رہے کہ صدر ڈونلڈ ٹرمپ کی نئی انتظامیہ کے تحت امریکا پہلے ہی ایچ ون بی پروگرام پر سخت اقدامات کر چکا ہے، جن میں نئی ویزا فیس اور امیگریشن جانچ کے سخت اصول شامل ہیں، جن سے بھارتی پیشہ ور افراد سب سے زیادہ متاثر ہو رہے ہیں۔