بارش سے موسم خوشگوار

فیصل آباد(سٹاف رپورٹر)فیصل آباد سمیت مختلف شہروںمیں بارش نے موسم کو سرد اور خوشگوارکر دیا، جب کہ محکمہ موسمیات نے آئندہ 24 گھنٹوں کے دوران مزید بارش کی پیش گوئی کی ہے۔ پنجاب کے مختلف شہروں نارروال، پتوکی، شیخوپورہ، حافظ آباد، مریدکے، کندیاں، سانگلہ ہل، کمالیہ، کالا شاہ کاکو، فاروق آباد اور ان کے ملحقہ علاقوں میں بھی بارش ہوئی۔دریں اثنا محکمہ موسمیات نے آئندہ 24 گھنٹوں کے دوران شمالی بلوچستان، خیبرپختونخوا، گلگت بلتستان، کشمیر اور خطہ پوٹھوہار میں پہاڑوں پر برف باری کے ساتھ ہلکی بارش / آندھی / گرج چمک کے ساتھ بارش کی پیش گوئی کی ہے، ملک کے دیگر علاقوں میں موسم سرد اور خشک رہنے کا امکان ہے۔یہاں یہ بات بھی قابل ذکر ہے کہ مغربی ہوائیں آج بروز 28 فروری(شام / رات)کو ملک کے مغربی علاقوں میں داخل ہونگی جو01 مارچ کو ملک کے بالائی علاقوں اور وسطی علاقوں تک پھیل جائیں گی اور مارچ 02 تک شمالی علاقہ جات پر موجود رہیں گی۔مغربی ہواں کے باعث 28 فروری (شام / رات)سے 02 مارچ کے دوران مری، گلیات ، کشمیر(وادی نیلم، مظفر آباد، پونچھ، ہٹیاں،باغ،حویلی،سدھنوتی، کوٹلی،بھمبر،میر پور)، گلگت بلتستان(دیامیر، استور، غذر، اسکردو، ہنزہ، گلگت، گا نچے، شگر)، چترال، دیر، سوات، مانسہرہ، کوہستان، شانگلہ، بونیر، ہری پور اور ایبٹ آباد میں تیز ہواوں اور گرج چمک کے ساتھ بارش اور پہاڑوں پر برف باری جب کہ اس دوران بعض مقامات پر موسلا دھار بارش/ برفباری کی بھی توقع ہے۔28 فروری سے 01 مارچ کے دوران اسلام آباد، خطہ پوٹھوہار ، پنجاب، بلوچستان اور خیبر پختونخوا کے مختلف علاقوں میں میں تیز ہواوں اور گرج چمک کے ساتھ بارش کا امکان ہے۔ اس دوران چند مقامات پر موسلا دھار بارش اور بعض مقامات پر ژالہ باری کی بھی توقع ہے۔