شکر گڑھ ‘ قصور، بہاولنگر (نمائندگان) دریائے ستلج کے تیور پھر بدلنے لگے، ہیڈ گنڈا سنگھ والا کے مقام پر پانی کی سطح ایک بار پھر20فٹ تک بلند ہو گئی دریائے ستلج میں سیلاب کے باعث ہیڈ گنڈا سنگھ والا کے مقام پر پانی کا بہا 65 ہزار کیوسک تک پہنچ گیا، دریا بپھرنے سے متعدد دیہات پانی میں ڈوب گئے جس کے باعث الرٹ جاری کر دیا گیا، ستلج اور راوی دونوں میں پانی کے باعث ضلعی انتظامیہ پھنس گئی، کیمپوں، ریسکیو اہلکاروں کو تعینات کرنا بھی مسئلہ بن گیا۔ضلع بہاولنگر میں ہیڈسلیمانکی پر نچلے درجے کے سیلاب کے باعث دریائے ستلج میں پانی کی سطح میں پھر سے اضافہ ہونے لگا، ہیڈ سلیمانکی کے مقام پر پانی میں اضافے کے ساتھ آمد 57196 اور اخراج 46186 کیوسک ہو گیا ہے۔ضلع بہاولنگر کی حدود میں نچلے درجے کے سیلاب سے تین تحصیلیں بری طرح متاثر ہوئیں، پانی کے تیز بہا کی وجہ سے متعدد حفاظتی بند ٹوٹ گئے، سیلابی پانی سے ہزاروں ایکڑ قیمتی فصلیں بھی تباہ ہوگئیں، درجنوں رہائشی ڈیرے، آبادیوں کو شدید نقصان پہنچا۔متاثرہ علاقوں کے ہزاروں لوگوں کی نقل مکانی جاری ہے، سیلابی پانی کی وجہ سے فصلیں اور مکان زیر آب آنے سے لوگ شدید مشکلات سے دوچار ہیں، سیلابی پانی سے موضع عاکوکا ، ماڑی میاں صاحب، سنتیکا ، بہادرکا ، چاویکا اور دیگر مواضعات میں دریائی کٹا جاری ہے۔احمد پور شرقیہ میں بھی دریائے ستلج میں پانی کی سطح میں 6 فٹ تک اضافہ ہوا ہے، پتن ایمن والہ کے قریب وسیع پیمانے پر فصلیں زیر آب آگئیں۔دریائے ستلج اور دریائے چناب کا پانی ہیڈ پنجند سے گزرنے پر ہیڈ پنجند پر بھی پانی کی سطح میں اضافہ ریکارڈ کیا گیا ہے، ہیڈ پنجند پر پانی کی آمد 40 ہزار 2 سو 85 کیوسک ہے، جبکہ پانی کا اخراج 30 ہزار 5 سو 85 کیوسک ہے۔دوسری جانب دریائے چناب میں پانی کی سطح میں اضافہ ہوا ہے، چناب نگر کے مقام پر پانی کا بہا 87 ہزار کیوسک، مرالہ کے مقام پر 1 لاکھ 18 ہزار، خانکی پر ایک لاکھ 31 ہزار جبکہ قادر آباد کے مقام پر 1 لاکھ 24 ہزار کیوسک ریکارڈ کیا گیا ہے۔ڈپٹی کمشنر چناب نگر کا کہنا ہے کہ نشیبی علاقوں سے لوگوں کو محفوظ مقامات پر منتقل کیا گیا ہے، ۔سیلابی صورت حال سے نمٹنے کے لئے متعلقہ ادارے مکمل تیار ہیں۔ علاوہ ازیں بھارت سے مزید پانی چھوڑے جانے اور موسلا دھار بارشوں کی وجہ سے دریائے راوی بپھرنے لگا ہے۔سیلابی ریلے نے شکر گڑھ کے سرحدی دیہات میں فصلیں تباہ کر دی ہیں، نالہ ڈیک سے سیلابی ریلا گزر گیا لیکن بھارت سے بہہ کر آنے والی بارودی سرنگیں شہریوں کے لیے خطرہ بن گئی ہیں، سرحدی دیہات سپوال اور لہری سے تین بارودی سرنگیں برآمد کی گئیں۔دوسری جانب وہاڑی، میلسی سائفن کے مقام پر دریائے ستلج میں پانی کی سطح میں مزید اضافہ ہوگیا ہے جبکہ بہاولنگر کے مقام پر نچلے درجے کے سیلاب کی وجہ سے ملحقہ دیہات اور آبادیاں خطرے کی زد میں ہیں۔ہزاروں ایکڑ پر کھڑی فصلوں کو شدید نقصان پہنچا ہے، متاثرینِ سیلاب سامان اور مویشیوں سمیت نقل مکانی کرنے پر مجبور ہیں۔
![](https://dailybusinessreport.pk/wp-content/uploads/2023/07/Untitled-4-copy-7.jpg)