تمباکو خریدنے والی کمپنیوں نے فصل کی خریداری میں کمی کردی

اسلام آباد (بیوروچیف) تمباکو خریدنے والی کمپنیوں نے 2026کی فصل کی خریداری میں نمایاں کمی کر دی ہے، جس کی وجہ سے مقامی کاشتکا ر وں کو بھاری مالی نقصان ہوا ہے، جب کہ کمپنیوں نے اضافی پیداوار سے اربوں روپے کا منافع کمایا ہے۔رپورٹ کے مطابق ذرائع نے بتایا کہ تمباکو خریدنے والی کمپنیوں نے 2026کی فصل کم مقدار میں خریدنے کا فیصلہ کیا ہے، انہوں نے اپنی خریداری میں 1کروڑ 31لاکھ 83ہزار کلو کی کمی کردی ہے، یہ مسلسل چوتھا سال ہے کہ خرید کم کی جارہی ہے اور اس فیصلے سے مقامی کسانوں کو بڑا مالی نقصان ہوگا۔ماہرین کا کہنا ہے کہ بڑی پاکستانی اور غیر ملکی کمپنیاں تو تمباکو زیادہ مقدار میں سنبھال کر رکھ سکتی ہیں، مگر غریب کسانوں کے پاس نہ پیسے ہوتے ہیں اور نہ ہی گودام اس وجہ سے وہ ورجینیا اور وائٹ پٹا جیسے تمباکو کو زیادہ دیر تک نہیں رکھ سکتے اور مجبورا فورا بیچ دیتے ہیں، جس سے انہیں مارکیٹ کے اتار چڑھا کا نقصان اٹھانا پڑتا ہے۔2026 کے لیے تمباکو کمپنیوں کی مجموعی طلب 6 کروڑ 16 لاکھ 27 ہزار کلوگرام مقرر کی گئی ہے، جس میں 5 کروڑ 81 لاکھ 84 ہزار کلوگرام فلو کیورڈ ورجینیا (ایف سی وی)، 3 لاکھ 60 ہزار کلوگرام ڈارک ایئر کیورڈ، 13 لاکھ 42 ہزار کلوگرام وائٹ پٹا، 13 لاکھ 81 ہزار کلوگرام برلی اور 3 لاکھ 60 ہزار کلوگرام سن کیورڈ تمباکو شامل ہیں۔