توانائی کی بچت،پرانے پنکھوں کو مرحلہ وار تبدیلی کیا جائے گا

اسلام آباد(بیوروچیف)توانائی کے شعبے میں اصلاحات کے تحت حکومت نے ایک 10 سالہ منصوبہ متعارف کرایا ہے، جس کے تحت ملک بھر میں 2 ارب روپے کی لاگت سے پرانے اور غیر مؤثر پنکھوں کو مرحلہ وار توانائی بچانے والے پنکھوں سے تبدیل کیا جائیگا۔ حکومت نے توانائی کی بچت کو فروغ دینے کے لیے ایک 10 سالہ سبسڈی پر مبنی پنکھا تبدیلی پروگرام شروع کرنے کا فیصلہ کیا ہے، جو ملک بھر کے تمام بجلی کے تقسیم کار اداروں بشمول کےـالیکٹرک میں نافذ کیا جائیگا۔ یہ اسکیم آن بل اسلامک فنانسنگ ماڈل کے تحت 2 ارب روپے کے فنڈ سے چلائی جائے گی، جس کے تحت ملک بھر میں نصب 14 کروڑ 70 لاکھ پنکھوں میں سے 8 کروڑ 80 لاکھ پرانے اور غیر مؤثر پنکھے مرحلہ وار تبدیل کیے جائیں گے۔ اس اقدام سے 6 ہزار سے 7 ہزار میگاواٹ تک کی توانائی کی بچت متوقع ہے، یہ منصوبہ رواں ماہ وزیرِا عظم کی جانب سے باقاعدہ طور پر متعارف کرائے جانے کا امکان ہے۔ذرائع کے مطابق، قرضے کراچی انٹربینک آفرڈ ریٹ (کے آئی بی او آر) 2 فیصد شرح پر دیے جائیں گے، جب کہ حکومت 10 فیصد فرسٹ لاس گارنٹی فراہم کرے گی۔یہ تفصیلات ایک اعلیٰ سطحی اجلاس کے دوران سامنے آئیں، جس کی صدارت وزیر خزانہ محمد اورنگزیب نے کی۔