زرعی یونیورسٹی میں گل دائودی نمائش کا انعقاد

فیصل آباد(سٹاف رپورٹر) زرعی یونیورسٹی فیصل آباد میں انسٹی ٹیوٹ آف ہارٹیکلچر سائنسز کے زیراہتمام تین روزہ گل داؤدی نمائش کا انعقاد کیا گیا۔ جس میں طلبہ، اساتذہ اور پھولوں کے شوقین افراد کی بڑی تعداد نے شرکت کی۔ مختلف رنگوں میں کھلتے پھول فطرت کے دلدادہ افراد کے لیے قابلِ دید نظارہ پیش کر رہے تھے۔ اپنے پیغام میں وائس چانسلر زرعی یونیورسٹی فیصل آباد پروفیسر ڈاکٹر ذوالفقار علی نے کہا کہ پھول ہمیں امن، محبت اور ہم آہنگی کا پیغام دیتے ہیں۔ انہوں نے کہا کہ ہمیں معاشرے میں بھائی چارے، برداشت اور باہمی تعاون کی خوشبو کو عام کریں ۔ انہوں نے کہا کہ نفرت کی بدبو کو بھائی چارے، صبر اور محبت کی مہک سے ختم کیا جا سکتا ہے۔ نمائش کا افتتاح کرتے ہوئے فیصل آباد ڈویلپمنٹ اتھارٹی کے ڈائریکٹر جنرل آصف چوہدری نے کہا کہ موجودہ دور میں ہر شخص کسی نہ کسی ذہنی دباؤ اور پریشانی کا شکار ہے۔ ایسے میں پھولوں کی یہ نمائش یکسانیت بھری مصروفیات سے دور ایک پُرسکون لمحہ فراہم کرتی ہے جہاں لوگ فطرت سے لطف اندوز ہو سکتے ہیں۔ڈائریکٹر ہارٹیکلچر ڈاکٹر احمد ستار نے کہا کہ نیدرلینڈ دنیا کا سب سے بڑا پھول برآمد کرنے والا ملک ہے جس کے بعد کولمبیا، کینیا، بیلجیم اور دیگر ممالک آتے ہیں۔ پاکستان عالمی 60 ارب ڈالر کے فلوریکلچر مارکیٹ میں اپنا حصہ حاصل کرکے زرِ مبادلہ کما سکتا ہے۔ ڈاکٹر افتخار احمد نے بتایا کہ نمائش میں 200 سے زائد اقسام کے پھول نہایت دلکش انداز میں پیش کیے گئے۔ انہوں نے کہا کہ زرعی یونیورسٹی فیصل آباد میں تیار کردہ پھولوں کی 20 اقسام بھی اس نمائش میں شامل کی گئی ہیں۔ انہوں نے کہا کہ یہ نمائش ہارٹی کلچر کے طلبہ کے لیے بھی ایک پلیٹ فارم ہے جہاں وہ تخلیقی انداز میں پھولوں کی ترتیب کا تجربہ حاصل کرتے ہیں جو اُن کے پیشہ ورانہ مستقبل کے لیے نہایت فائدہ مند ہے۔ اس موقع پر سیاسی و سماجی شخصیت نجمہ افضل، ڈپٹی کمشنر ساہیوال شاہد محمود، ایس ایس پی ضیاء اللہ، ڈاکٹر عدنان یونس ، ڈاکٹر آصف، ڈاکٹر محمد اسلم، ڈاکٹر محمد عثمان، ڈاکٹر راحیل، ڈاکٹر محسن بشیر، ڈاکٹر کاشف سلیمی، ڈاکٹر اعجاز اشرف و دیگر بھی موجود تھے۔