سینکڑوں ہائی سکولوں کو ہائر سکینڈری کا درجہ دینے کا منصوبہ

لاہور (بیوروچیف) پنجاب بھر کے سینکڑوں ہائی سکولوں کو ہائر سیکنڈری کا درجہ دینے کا فیصلہ کیا گیا ہے، جس کے بعد طلبا و طالبات متعلقہ ادارے سے ایف اے اور ایف ایس سی کر سکیں گے۔پنجاب بھر کے سکولوں کو اپ گریڈ کرنے کے لیے متعلقہ حکام نے ڈیٹا طلب کر لیا ہے۔ ہائی سکولوں کی اپ گریڈیشن کے لیے جگہ کی دستیابی اور بلڈنگ کے موزوں ہونے کی جانچ کے بعد فیصلہ کیا جائے گا۔ہائی سکولوں کے سربراہان سے ادارے کے بارے میں مکمل رپورٹ طلب کی گئی ہے جبکہ تھرڈ پارٹی کے ذریعے ہائی سکول کا معائنہ کرنے کے بعد ہی انہیں ہائر سیکنڈری کا درجہ دیا جائے گا۔پنجاب بھر میں ہائی سکولوں کی تعداد 6ہزار ہے، جن میں سے اب تک 5,800ہائی سکولوں نے اپنا ڈیٹا فراہم کر دیا ہے جبکہ 795ہائی سکولوں نے جگہ دستیاب ہونے پر اپ گریڈیشن کی خواہش ظاہر کی ہے۔