لٹل ماسٹر حنیف محمد کو دنیا چھوڑے 9برس بیت گئے

لاہور(سپورٹس نیوز) پاکستان کرکٹ کا بڑا نام، لٹل ماسٹر حنیف محمد کو دنیا چھوڑے 9 برس بیت گئے۔سابق کپتان حنیف محمد نے لاتعداد ریکارڈز اور کئی اعزازات اپنے نام کئے، حنیف محمد کا نام آئی سی سی ہال آف فیم میں بھی درج ہے، پاکستان کی جانب سے پہلی ٹرپل سنچری بنانے والے حنیف محمد کو صدارتی تمغہ حسن کارکردگی سے بھی نوازا گیا۔21 دسمبر 1934 کو جونا گڑھ، متحدہ ہندوستان میں پیدا ہونے والے حنیف محمد کے بھائیوں وزیر محمد، رئیس محمد، مشتاق محمد اور صادق محمد نے بھی ٹیسٹ کرکٹ میں پاکستان کی نمائندگی کی، ان کی والدہ امیر بی بی بھی کھیلوں سے گہرا شغف رکھتی تھیں اور متحدہ ہندستان کی ویمن بیڈمنٹن چیمپئن بھی رہیں۔ بھارت کے خلاف 1952 میں پہلا ٹیسٹ کھیلنے والے حنیف محمد نے 55 ٹیسٹ میچز کی 97 اننگز میں12 سنچریوں اور 15 ففٹیز کی مدد سے 3 ہزار 915 رنز سکور کئے، انہوں نے ٹیسٹ کرکٹ میں صرف دو چھکے لگائے اور ایک ٹیسٹ وکٹ بھی اپنے نام کرنے کا اعزاز پایا۔