مریم نواز کا اینٹی سموگ پلان سخت،لاؤڈ سپیکر ایکٹ کی خلاف ورزی پر کریک ڈاؤن کا حکم

لاہور(بیوروچیف) لاہور میں شمال مغربی ہوائوں کے باعث درآمد شدہ آلودگی میں اضافہ ہونے پر پنجاب حکومت نے شہریوں کو بروقت آگاہی فراہم کرنے اور اینٹی سموگ پلان مزید سخت کرنے کا فیصلہ کر لیا۔وزیراعلیٰ پنجاب مریم نواز کی ہدایات پر تمام ادارے 24/7 فیلڈ میں متحرک ہیں اور فضائی آلودگی کے سدباب کے لیے سائنسی بنیادوں پر اقدامات کیے جا رہے ہیں، صنعتی شہروں سے آنے والی آلودگی کی سائنٹیفک میپنگ کے ذریعے مکمل ریکارڈ مرتب کیا جا رہا ہے جبکہ حکومتی اقدامات سے آئندہ دنوں میں واضح بہتری کی توقع ظاہر کی گئی ہے۔محکمہ ماحولیات کے مطابق شمال مغربی ہواں کے باعث آلودگی کی آمد میں اضافہ ضرور ہوا ہے تاہم حکومتی ریگولیشنز میں کسی قسم کی نرمی نہیں برتی جا رہی، فصلوں کی باقیات جلانے کی روک تھام کے لیے ڈرون سرویلنس اور گرانڈ ٹیموں کی کارروائیاں مزید تیز کر دی گئی ہیں۔وزیراعلی کی ہدایات پر ریئل ٹائم ڈیٹا شیئرنگ، وارننگ سسٹم اور فوری رسپانس یونٹس کو مزید مضبوط بنایا گیا ہے، سموگ کنٹرول مشینری، واٹر بازرز اور انسپیکشن ٹیموں کو بھی لاہور میں ہائی الرٹ کر دیا گیا ہے۔حکومت نے شہریوں، خصوصا حساس افراد کو ہدایت کی ہے کہ غیر ضروری طور پر باہر نکلنے سے گریز کریں، ماسک کا استعمال بڑھائیں، پانی زیادہ پئیں اور سانس میں تکلیف کی صورت میں فوری طور پر قریبی ہسپتال سے رجوع کریں۔سینئر صوبائی وزیر مریم اورنگزیب کا کہنا ہے کہ پنجاب حکومت خطے میں سب سے جامع اینٹی اسموگ پلان پر عملدرآمد کر رہی ہے اور عوامی تعاون سے صورتحال مزید بہتر ہو گی۔دریں اثنا۔لاہور (بیوروچیف) پنجاب حکومت نے صوبے بھر میں ون ڈش کی خلاف ورزی اور لائوڈ اسپیکر کے غیر ضروری استعمال کے خلاف بڑے پیمانے پر کریک ڈائون کا فیصلہ کر لیا ہے۔وزیراعلیٰ پنجاب مریم نواز نے کمشنرز اور ڈپٹی کمشنرز کو ہدایت کی ہے کہ شادیوں اور تقریبات میں ون ڈش پالیسی پر سختی سے عمل درآمد کرایا جائے۔ وزیراعلیٰ نے بلند آہنگ میوزک اور قوالی نائٹس سمیت تقریبات میں غیر قانونی طور پر لائوڈ اسپیکر کے استعمال کے خلاف فوری کارروائی کا حکم بھی دے دیا۔حکام کے مطابق فارم ہائوسز، گرائونڈز اور کھلے مقامات پر بھی لائوڈ اسپیکر کے غیر ضروری استعمال کو روکنے کے لیے اقدامات کیے جا رہے ہیں۔ اجلاس میں فارم ہائوسز اور دیگر بڑے مقامات پر ون ڈش کی پابندی یقینی بنانے کا اصولی فیصلہ بھی کیا گیا۔وزیراعلیٰ نے متعلقہ اداروں کو میرج ہالز کے مقررہ اوقات کار کی مانیٹرنگ مزید سخت کرنے کی ہدایت کرتے ہوئے کہا کہ قوانین کی خلاف ورزی پر بلا امتیاز کارروائی کی جائے۔