ملکی مالی خسارے اور سود اخراجات میں نمایاں کمی

اسلام آباد (بیوروچیف) اقتصادی تھنک ٹینک ٹاپ لائن ریسرچ نے پاکستان کی معاشی صورتحال پر رپورٹ جاری کردی۔رپورٹ میں بتایا گیا ہے کہ پاکستان کے مالی خسارے اور سود اخراجات میں نمایاں کمی جبکہ محصولات میں اضافہ ہوا،گزشتہ مالی سال کے معاشی اشاریئے آئی ایم ایف کی توقعات سے بھی بہت بہتر رہے۔ رپورٹ مطابق 2024-25 میں پاکستان کا مالی خسارہ 9 سال کی کم ترین سطح پر آگیا،پاکستان کا مالی خسارہ مجموعی قومی پیداوارکا صرف 5.38فیصد رہا،یہ کامیابی ٹیکس اور نان ٹیکس ریونیو میں 36فیصد سالانہ اضافے کی وجہ سے ہوئی،گزشتہ مالی سال کے دوران اخراجات میں بھی صرف 18فیصد اضافہ ہوا ۔ ٹاپ لائن ریسرچ کیمطابق خسارہ حکومت کی نظرثانی شدہ 5.6فیصد اورآئی ایم ایف کی پیشگوئی سے بہتر رہا،ابتدائی بجٹ میں خسارے کا تخمینہ 5.9 فیصد لگایاگیا تھا،گزشتہ مالی سال نان ٹیکس آمدن میں 66 فیصد کا اضافہ دیکھنے میں آیا،اسٹیٹ بینک سے حاصل ریکارڈ 2.62ٹریلین روپے کے منافع سے ممکن ہوا، اس سے پچھلے سال اسٹیٹ بینک کا منافع ایک ہزار ارب روپے سے بھی کم تھا۔