ملک بھر میں نادرا سنٹرز کی تعداد بڑھائی جائے

فیصل آباد(سٹاف رپورٹر)انجمن تاجران کچہری بازار کے صدر اور معروف تاجر رہنما چوہدری خالد جٹ نے کہا ہے کہ جس طرح وفاقی حکومت عوامی مسائل کے حل کیلئے دن رات کوشاں ہے اور مختلف پراجیکٹس کا آغاز کیا جا رہا ہے اسی طرح ضروری ہے کہ ملک بھر میں نادرا سنٹروں کی تعداد بڑھانے کیلئے عملی اقدامات کئے جائیں اور کم از کم ہر ایم این اے یا ممبر پنجاب اسمبلی کے علاقہ کی سطح پر ایک ایک نادرا سنٹر قائم کیا جائے انہوں نے کہا ہے کہ موجودہ وقت میں فیصل آباد سمیت ملک بھر میں نادرا سنٹروں کی کمی کے باعث قومی شناحتی کارڈز یا ”ب فارم” کیلئے آنے والوں کو نہ صرف سخت مشکلات کا سامنا کرنا پڑتا ہے بلکہ لوگ صبح سے لے کر شام تک لمبی لمبی قطاروں میں لگ کر ذلیل و خوار ہو رہے ہیں۔