واسا ایمپلائز ویلفیئر فنڈ کمیٹی کا اجلاس

فیصل آباد (سٹاف رپورٹر) منیجنگ ڈائریکٹر واسا عامر عزیز کی ہدایت پر واسا ملازمین کے بچوں کے تعلیمی وظائف، فوتیدگی کی صورت میں تکفین و تدفین گرانٹ میں اضافہ،ملازمین کے لئے ایسٹر،کرسمس اور عید الانس کی منظوری جبکہ ہر سال تین ملازمین کو بذریعہ قرعہ اندازی عمرہ کی ادائیگی کے اخراجات دئیے جائیں گے۔اس ضمن میں واسا ایمپلائز ویلفیئر فنڈ کمیٹی کا اجلاس چیئرمین و ڈپٹی منیجنگ ڈائریکٹر ایڈمن شعیب رشید کی صدارت میں منعقد ہوا جس میں مختلف ایجنڈا آئیٹمزپر تبادلہ خیال کرتے ہوئے متفقہ طورپر منظوری دی گئی جس میں واسا ملازمین کے بچوں کے تعلیمی وظائف میں اضافہ کیا گیا ہے۔ جس کے تحت انٹرمیڈیٹ کلاس سے پی ایچ ڈی تک وظائف میں اضافہ کیا گیا جبکہ کلاس میں 60فیصد نمبر حاصل کرنا لازمی ہو گا تاہم ملازم کی ریٹائرمنٹ اور دوران سروس وفات پانے پر ان کے بیٹے یا بیٹی کے وظیفہ کے آرڈر جاری ہو جاتے ہیں تو متعلقہ ڈگری یا سند کے دورانیہ کا وظیفہ جاری رکھنے کا بھی فیصلہ کیا گیا ہے۔اسی طرح واسا ملازمین کی فوتیدگی کی صورت میں تکفین و تدفین کی گرانٹ 50ہزار جبکہ واسا ملازم کے فیملی ممبر کی فوتیدگی کی صورت میں تکفین و تدفین کی گرانٹ 30ہزار روپے کر دی گئی ہے۔ کمیٹی اجلاس کے مطابق ویلفیئر فنڈ سے ایسٹر اور کرسمس کے موقع پر مسیحی ملازمین جن کی ویلفیئر فنڈ سے کٹوتی کی جاتی ہے انہیں 2ہزار روپے ایسٹر اور کرسمس الانس دیا جائے گا،اسی طرح عید کے موقع پرریگولر ملازمین کو ویلفیئر فنڈ سے 2ہزار روپے عید الانس بھی دیا جائے گا۔کمیٹی کے فیصلہ کے مطابق ویلفیئر فنڈ میں سے ہر سال تین مسلمان ملازمین جن کی ریگولر سروس 5سال سے زیادہ ہو گی ان میں گریڈ ایک سے 10کا ایک ملازم، گریڈ 11سے 16تک کا ایک ملازم اور گریڈ 17تا زائد ایک ملازم کو بذریعہ قرعہ اندازی عمرہ کی سعادت حاصل کرنے کے لئے سعودی عرب بھیجنے کا فیصلہ کیا گیا ہے تاہم جن ملازمین کا نام قرعہ اندازی میں ایک بار عمرہ کی ادائیگی کے لئے آ جائے گا وہ دوبارہ اہل نہ ہو ں گے۔ اجلاس کے دوران ویلفیئر فنڈ میں اضافہ کے لئے ملازمین کی ماہانہ شرح کٹوتی میں بھی اضافہ کیا گیا ہے۔