واسا حکام کے مین ہول کو رز چوری کرنیوالوں کیخلاف سخت احکامات

فیصل آباد (سٹاف رپورٹر) واسا حکام نے مین ہول کورز کی چوری اور خریدو فروخت میں ملوث افراد کیخلاف سخت ایکشن لینے کے احکامات جاری کر دئیے ہیں اور واضح کیا ہے کہ جو شخص بھی اس گھنانے فعل کا مرتکب ہوا اس کے خلاف فوری مقدمہ درج کروا کر قانونی کارروائی کی جائے گی۔ واسا کی مجاز اتھارٹی کی جانب سے حکم جاری کیا گیا ہے کہ شہر بھر میں واسا کے مین ہول کورز کی چوری میں ملوث اور اس کو خریدنے اور فروخت میں شامل افراد کے خلاف کریک ڈان شروع کر دیا گیا ہے جبکہ مین ہولز کے کور کی چوری اور خرید و فروخت کرنیوالے ملزمان کے خلاف فوری طور پر مقدمات درج کروا کر قانونی کارروائی عمل میں لائی جائے گی اور اس حوالے سے کسی قسم کا کوئی سمجھوتہ نہیں کیا جائے گا۔ مجاز اتھارٹی کے مطابق مین ہول کے کورز کی چوری کے باعث قیمتی انسانی جانوں کے ضیاع کا خدشہ ہوتا ہے اس لئے اس پر کسی صورت چشم پوشی کرنا ممکن نہیں۔ اس ضمن میں آپریشنز ڈائریکٹوریٹس افسران اور سٹاف کو بھی خصوصی مانیٹرنگ کرنے کی ہدایت کی گئی ہے کہ وہ اپنے متعلقہ ایریاز میں مانیٹر کریں کہ کسی جگہ مین ہول کورز مسنگ نہ ہوں اور کسی بھی شکایت کی صورت میں مسنگ مین ہولز کو فوری طور پر کور کروایا جائے۔