وکرانت میسی کا اداکاری سے ریٹائرمنٹ کا اعلان

ممبئی(شوبز نیوز) بالی ووڈ فلم بارہویں فیل سے شہرت پانے والے اداکار وکرانت میسی نے ریٹائرمنٹ کا اعلان کر دیا۔فوٹو اینڈ ویڈیو شیئرنگ پلیٹ فارم انسٹاگرام پر 37 سالہ اداکار نے پوسٹ شیئر کرتے ہوئے اپنی ریٹائرمنٹ کا اعلان کر کے سب کو حیران کر دیا ہے۔انہوں نے انسٹاگرام پر ایک نوٹ شیئر کرتے ہوئے کہا ہے کہ 2025 میں آخری بار اپنے مداحوں سے ملوں گا۔انہوں نے نوٹ میں لکھا کہ پچھلے کچھ سال یقینی طور پر غیر معمولی رہے، میں بے تحاشہ حمایت پر آپ سب کا شکر گزار ہوں۔وکرانت میسی نے لکھا ہے کہ میں جیسے جیسے اپنی زندگی میں آگے بڑھ رہا ہوں مجھے احساس ہو رہا ہے کہ اب وقت آ چکا ہے کہ بطور شوہر، والد، بیٹے اور اداکار بھی مجھے اپنی کچھ ذمے داریاں نبھانی ہیں جو میں پہلے نہیں نبھا سکا۔