ٹرمپ اور مودی کی لڑائی کی وجہ پاک بھارت جنگ

واشنگٹن (مانیٹرنگ ڈیسک) ٹرمپ اور مودی کی لڑائی کی اصل وجہ پاک بھارت جنگ، امریکی صدرنے خود کو ثالث ثابت کرنے کی کوشش کی اور اعلان کیا جنگ بندی کا کریڈٹ انہیں جاتا ہے تاہم بھارت یہ بات نہ مانا۔ذرائع کے مطابق اصل تنازع روس نہیں بلکہ مئی میں بھارت اور پاکستان کے درمیان کشمیر میں حملے کے بعد شروع ہونے والی جھڑپیں بنیں۔ ٹرمپ نے خود کو ثالث ثابت کرنے کی کوشش کی اور اعلان کیا کہ جنگ بندی کا کریڈٹ انہیں جاتا ہے۔ پاکستان کی جانب سے ٹرمپ کے نوبیل امن انعام کے مستحق ہونے کا تاثر دینے پر مودی مزید ناراض ہوئے۔ ٹرمپ نے پھر پاکستان کے ساتھ توانائی، کرپٹو کرنسی اور معدنیات میں بڑے معاہدے کیے اور مودی سے اپنی نوبیل مہم کی حمایت مانگی، جس نے تعلقات مزید خراب کر دیے۔اس کے بعد اگست میں ٹرمپ نے بھارت پر 50فیصد ٹیرف لگا دیا جس کے جواب میں مودی نے چین کے شی جن پنگ کی دعوت پر 7سال بعد پہلی مرتبہ چین کا دورہ کیا اور روسی صدر پوٹن کے ساتھ قریبی رابطہ کیا۔ یہ ایک واضح پیغام تھا کہ بھارت امریکی دبائو میں نہیں آئے گا۔ تاہم مودی نے چین کے فوجی پریڈ میں شریک نہ ہو کر یہ بھی دکھا دیا کہ بھارت اور چین کے تعلقات میں مستقل بداعتمادی موجود ہے۔اب کچھ اشارے مل رہے ہیں کہ امریکا اور بھارت تعلقات میں دراڑ کم کرنے کی کوشش کر رہے ہیں۔