ٹم ساؤتھی نیوزی لینڈ ٹیم کی کپتانی سے مستعفی ہوگئے

ویلنگٹن (سپورٹس نیوز) نیوزی لینڈ کی ٹیسٹ ٹیم کے کپتان ٹم ساتھی کپتانی سے مستعفی ہوگئے، یہ فیصلہ انہوں نے سری لنکا میں ٹیم کی شرمناک کارکردگی کے بعد کیا۔ساتھی کی قیادت میں نیوزی لینڈ کوسری لنکا میں دونوں ٹیسٹ میں شکست ہوئی تھی، جس کے بعد خود کو جوابدہ ٹھہراتے ہوئے ساتھی نے اپنے عہدے سے استعفیٰ دے دیا۔ٹم ساتھی کے مستعفی ہونے کے بعد ٹام لیتھم بھارت کے خلاف ٹیسٹ سیریز میں نیوزی لینڈ ٹیم کی قیادت کریں گے۔35سالہ فاسٹ بالر نے سال 2022 میں کین ولیمسن کے بعد ٹیم کی کپتانی سنبھالی اور 14 ٹیسٹ میچوں میں ٹیم کی قیادت کی۔ اس حوالے سے ساتھی نے کہا کہ انہوں نے یہ فیصلہ قومی ٹیم کے مفاد میں کیا ہے۔مستعفی کپتان ٹم ساتھی نے اپنے بیان میں کہا کہ بلیک کیپس کی قیادت کرنا میرے لیے ایک اعزاز اور فخر کی بات ہے۔ میں نے ہمیشہ اپنی ٹیم کو اولین ترجیح دی ہے اور مجھے یقین ہے کہ یہ فیصلہ ٹیم کے لیے بہتر ہے۔ان کا کہنا تھا کہ میں سمجھتا ہوں کہ میدان میں اپنی کارکردگی پر توجہ مرکوز کرتے ہوئے ٹیم کی بہترین خدمت کر سکتا ہوں تاکہ وکٹیں لیتا رہوں۔