ٹک ٹاک کے نئے فیچرز متعارف

کراچی ( بیو رو چیف )ٹک ٹاک نے پاکستانی صارفین کے لیے نئے فیچرز متعارف کرانے کا اعلان کیا ہے تاکہ ان کے تحفظ اور دیگر افراد تک رسائی میں معاونت فراہم کی جاسکے۔کمپنی کے مطابق ان نئے فیچرز سے پاکستانی صارفین اپنے مداحوں سے زیادہ بہتر طریقے سے رابطہ قائم کرسکیں گے اور انہیں اس پلیٹ فارم پر زیادہ کنٹرول حاصل ہوگا۔ان میں سے ایک فیچر کریٹیر کیئر موڈ ہے۔اس فیچر کے تحت پاکستانی صارفین اپنے کمنٹ سیکشن کو بہتر انداز سے منظم کرسکیں گے ۔جب فیچر کو ان ایبل کیا جائے گا تو کریٹیر کیئر موڈ خودکار طریقے سے ان کمنٹس کو چھپا دے گا جو توہین آمیز، ہراساں کرنے والے یا نامناسب نوعیت کے ہوں گے۔اس کی جانب سے ان صارفین کے کمنٹس کو بھی فلٹر کیا جائے گا جن کے کمنٹس کو آپ پہلے رپورٹ، ڈس لائیک یا ڈیلیٹ کرچکے ہوں گے۔کمپنی نے بتایا کہ اس فیچر کے لیے آرٹی فیشل انٹیلی جنس (اے آئی)کو استعمال کیا جائے گا۔دوسرا فیچر کانٹینٹ چیک لائٹ ہے جو صارفین کے لیے ایک اور مفید ٹول ہے۔یہ فیچر فی الحال صرف ٹک ٹاک اسٹوڈیو کے ویب ورژن میں دستیاب ہوگا۔اس فیچر سے صارفین کو معلوم ہوسکے گا کہ ان کی پوسٹ کی جانے والی ویڈیوز کی رسائی محدود تو نہیں ہوگی۔یعنی وہ یہ جان سکیں گے کہ ان کا مواد فار یو فیڈ میں نظر آنے کے قابل ہے یا نہیں۔اس طرح وہ اپنی پوسٹ سے پہلے ویڈیو میں ایسی تبدیلیاں کرسکیں گے جن سے ویڈیو کو زیادہ سے زیادہ افراد تک رسائی مل سکے گی۔کمپنی کے مطابق ممکنہ مسائل کی ابتدائی نشاندہی کے ذریعے صارفین اپنے مواد میں ایسی تبدیلیاں کر سکیں گے جو کمیونٹی گائیڈ لائنز کے مطابق ہوں۔اس کے علاوہ ٹک ٹاک نے کریٹیر ان باکس بھی متعارف کرایا ہے جو ایسا میسجنگ ہب ہے، جس میں فوری جوابات کے ٹیمپلیٹس اور ان ریڈ (unread) میسجز ہوں گے، جبکہ اسٹار لگائے گئے پیغامات کے لیے الگ فولڈرز دیے جائیں گے۔اس فیچر کا مقصد صارفین کواپنے مداحوں کے ساتھ رابطے کو آسان اور تیز بنانے میں مدد فراہم کرنا ہے۔