ٹی ٹوئنٹی ورلڈ کپ 32ٹیموں پر مشتمل کرنے کی تجویز

لاہور (سپورٹس نیوز) ٹی 20ورلڈ کپ 2028کو 32ٹیموں پر مشتمل کرنے کی تجویز سامنے آگئی۔کرکٹ ویب سائٹس کی رپورٹ کے مطابق کرکٹ کے فارمیٹس اور بڑے ٹورنامنٹس کے لیے ورکنگ گروپ تشکیل دے دیا گیا ہے۔ 6افراد پر مشتمل ورکنگ گروپ کی سربراہی نیوزی لینڈ کرکٹ کے سربراہ راجر ٹوز کریں گے جبکہ آئندہ سال کے ورلڈ کپ میں 20ٹیمیں شامل ہوں گی۔رپورٹ میں بتایا گیا ہے کہ ورکنگ گروپ میں بھارت، انگلینڈ اور آسٹریلیا کے کرکٹ بورڈ کے سربراہ شامل ہیں، یو ایس اے کرکٹ کی معطلی تین مہینے تک موخر ہونے کا امکان ہے۔اس سلسلے میں یو ایس اے کرکٹ کو انتظامی معاملات کے حل کے لیے 3مہینے کا وقت دیا جائے گا۔یہ اقدام اٹلی ٹیم کی کامیابی کے بعد سامنے آیا ہے جس نے حال ہی میں 2026میں اپنے پہلے ٹی 20ورلڈ کپ کے لیے کوالیفائی کر کے تاریخ رقم کی ہے۔امریکا اور اٹلی جیسے غیر روایتی ممالک میں کرکٹ کی ترقی نے آئی سی سی کو ایک وسیع عالمی حکمت عملی اختیار کرنے کی ترغیب دی ہے۔ 2028تک مزید 12ٹیمیں شامل کرنا کرکٹ کو عالمی سطح پر پھیلانے کے لیے ایک بہت بڑا قدم ہوگا۔ اس سے مزید ایسوسی ایٹ نیشنز، ممالک جہاں کرکٹ اب بھی ترقی کر رہی ہے، کو عالمی سطح پر مقابلہ کرنے کا موقع ملے گا۔یہ دنیا بھر کے شائقین کو خوش کرنے کے لیے مزید ٹیمیں اور مزید سنسنی خیز میچوں سے لطف اندوز ہونے کا موقع فراہم کرتا ہے۔