پاکستانی ٹیکسٹائل مصنوعات دنیا میں پسند کی جاتی ہیں’ مریم نواز

لاہور (بیوروچیف)پاکستان مسلم لیگ (ن) کے صدر محمد نواز شریف اوروزیراعلیٰ پنجاب مریم نوازشریف سے ازبکستان کے صوبے تاشقند کے گورنر زوئیر مرزا ایوف نے 7 رکنی وفد کے ہمراہ ملاقات کی ۔پنجاب اور تاشقند کو برادر صوبہ قرار دینے پر اتفاق،خصوصی کمیٹی تشکیل دے دی گئی ہے۔ٹورازم، زراعت، لائیو سٹاک،میٹ پراسیسنگ،بیوریجز،سٹرس فروٹ اور دیگر سیکٹرز میں معاشی تعاون پر اتفاق کیاگیاہے۔ازبکستان کی طرف سے لاہور میں بابر پارک کے قیام کی تجویز پر غور کیاگیا۔گورنر تاشقند نے لاہور میں مغل دور کی تاریخی عمارتوں کی بحالی پر وزیراعلیٰ مریم نواز شریف کو خراج تحسین پیش کیا ۔وزیراعلیٰ مریم نواز شریف نے دورہ ازبکستان کی دعوت شکریہ کے ساتھ قبول کرلی۔ گورنرتاشقند نے ازبکستان کے صدر کی طرف سے پاکستانی عوام بالخصوص اہل پنجاب کیلئے نیک تمناؤں کا پیغام دیا۔ازبک پلاؤ کی تعریف پر گورنر تاشقند نے اظہار مسرت کیا اور پاکستانی باورچیو ں کی ٹریننگ کیلئے ازبک شیف بھیجنے کی پیشکش کی۔قائد محمد نواز شریف اوروزیراعلیٰ مریم نواز شریف نے تاشقند کے گورنر زویئر مرزاایوف کا پرتپاک استقبال کیا۔ تاشقند کے گورنر زویئر مرزا ایوف نے پرجوش خیر مقدم کرنے پر اظہار تشکرکیا۔صدر پاکستان مسلم لیگ (ن) محمد نواز شریف نے کہا کہ پاکستانی ازبکستان کے علمی و ثقافتی ورثے پر فخر کرتے ہیں۔ثمرقند ماضی کی طرح آج بھی علم و ہنر کا مرکز و محور ہے۔ ازبکستان کے کھانے بالخصوص پلاؤ پاکستانیوں کے مرغوب کھانوں میں شامل ہے۔ متحدہ ہندوستان کے پہلے مغل بادشاہ فرغانہ سے ہندوستان آئے، آج بھی ان کی متاثر کن حکمرانی کی داستان پڑھی جاتی ہے۔ انہوںنے کہا کہ لاہور کی ہزاروں سال پرانی تاریخ ہے، لاہور سے محبت ہے، جب وزیر اعظم تھا تو ہر ویک اینڈ پر لاہور آجاتا تھا۔پاکستان مسلم لیگ ن کے صدر محمد نواز شریف نے ازبکستان کے لوگوں بالخصوص اہل ثمر قند کو سلام محبت پیش کیا۔گورنر تاشقند زوئیر مرزا ایوف نے پنجاب میں ٹورازم کے فروغ اور سائٹس کی بحالی کو سراہا ۔ گورنر تاشقند نے کہاکہ پنجاب میں ٹورازم،آرکیالوجی، میوزیم اور سیاحت کے فروغ کیلئے وزیراعلی مریم نواز شریف کی کاوشیں قابل تحسین ہیں۔ زوئیر مرزا ایوف گورنر تاشقند نے کہاکہ محمد نواز شریف صاحب سے ملاقات کو اپنا اعزاز سمجھتا ہوں۔پاکستان کے ساتھ سماجی اور معاشی تعاون کو مزید فروغ دینے کے منتظر ہیں۔پاکستان اور ازبکستان کے درمیان سیاحت، فارماسیوٹیکل، زراعت اور دیگر سیکٹرز میں معاشی تعلقات کے فروغ کے بیشمار مواقع موجود ہیں۔ازبکستان میں ڈھائی ہزار کمپنیاں 74 ممالک کے اشتراک کار سے کام کررہی ہیں۔ازبکستان میں پاکستانی سرمایہ کاروں کے اشتراک سے 22کمپنیاں، ٹیکسٹائل، زراعت اور میٹ پراسیسنگ دیگر سیکٹرزکام کررہی ہیں۔دورہ پاکستان کے مثبت اور حوصلہ افزاء معاشی نتائج کے لئے پر امید ہیں۔انہوںنے کہا کہ ازبکستان میں ٹیکسائل بالخصوصی پولیسٹر کی بہت مانگ ہے۔ پاکستانی کمپنیوں کا اشتراک کار میں خیر مقدم کریں گے۔ گورنر تاشقند نے ازبک مسجد کا سوویئنر دیکھ کر اظہار مسرت کیا۔وزیراعلیٰ پنجاب مریم نوازشریف نے کہا کہ ازبکستان برادر ملک ہے، سماجی اور معاشی تعلقات مزید مستحکم کرنا چاہتے ہیں۔ازبکستان سے محبت مجھے والد محترم محمد نواز شریف اور والدہ مرحومہ کی طرف سے ورثے میں ملی ہے۔ لاہور میں ازبک کوزین ریسٹورنٹ پاکستانیوں کی ازبکستان سے محبت کا ثبوت ہے۔ پنجاب میں بہت سے تاریخی مقامات سیاحتی توجہ کا مرکز ہیں۔ لاہور میں مغل دور کے بیشمار آثار قدیمہ موجود ہیں۔ برادار ملک ازبکستان سے آنیوالے وفد کا خیر مقدم کرتے ہیں، امید ہے کہ دورہ پاکستان مثبت نتائج کا حامل ہوگا۔انہوںنے کہا کہ ازبکستان سے آنیوالے سرمایہ کاروں کے دورہ کو نتیجہ خیز بنانے کیلئے پرامید ہیں۔ ازبکستان کیلئے پاکستانی ایکسپورٹ بڑھ رہی ہے۔پنجاب میں زراعت، صنعت، سوشل سیکٹر اور انفراسٹرکچر میں بہتری کیلئے اربوں روپے لگائے گئے ہیں۔ملک کی زراعت کا 70 فیصد حصہ پنجاب سے ہے، سیالکوٹ، وزیر آباد اور فیصل آباد جیسے شہر انڈسٹریل ہب ہیں۔ انہوںنے کہاکہ پاکستانی چاول دنیا میں بہترین شمار کیا جاتا ہے، اس کے ساتھ مکئی اور گندم بھی پنجاب کی بڑی فصلیں ہیں۔ پنجاب میں زراعت اور لائیواسٹاک کی ویلیو ایڈڈ پراڈکٹ پر توجہ دے رہے ہیں۔ پنجاب میں عالمی معیار کے مطابق تین لاکھ مویشی میٹ ایکسپورٹ کیلئے موزوں اور تیار ہیں۔پنجاب میں میٹ کی کوالٹی بہتر بنانے کیلئے بھاری بھرکم سرمایہ کاری کی گئی ہے۔ انہوںنے کہاکہ ازبکستان اور پاکستان اشتراک کار سے دنیا کو حیران کر سکتے ہیں۔ پاکستان ویلیو ایڈڈ ٹیکسٹائل میں لیڈ لے رہا ہے۔ پاکستان کی بیڈ شیٹ، ٹاول اور دیگر ٹیکسٹائل مصنوعات دنیا بھر میں پسند کی جاتی ہیں۔