پرائیویٹ سکولز کے باہر کمپلینٹ سیل بورڈ آویزاں نہ ہوسکے

ساہیانوالہ (نامہ نگار) چک جھمرہ اور گردونواح میں پرائیویٹ سکولوں کے باہر محکمہ تعلیم کے کمپلینٹ سیل بورڈز آویزاں نہ کیے جاسکیں شہریوں کی سی ای او ایجوکیشن فیصل آباد سے کاروائی کی اپیل تفصیلات کے مطابق پنجاب حکومت کی طرف سے پرائیویٹ سکولز پر فیسوں میں اضافے، والدین کو یونیفارم، کتابیں، سٹیشنری خریدنے پر مجبور کرنے سمیت مختلف پابندیاں عائد کی گئی ہیں۔ جبکہ ان قوانین پر عملدرآمد کرانے کیلئے محکمہ تعلیم میں کمپلینٹ سیل قائم کرتے ہوئے شکایت درج کرانے کیلئے نمبرز سکولوں کے باہر آویزاں کرنے کے احکامات جاری کیے گئے تھے۔تاکہ والدین نجی تعلیمی سیکٹر کے خلاف شکایت کی صورت میں محکمہ تعلیم کے کمپلینٹ نمبر پر رابطہ کرسکیں لیکن نجی سکولوں نے محکمہ تعلیم کے احکامات کو نظر انداز کرتے ہوئے تاحال کمپلینٹ نمبر آویزاں نہیں کیے ذرائع کے مطابق جھمرہ کے معروف نجی سکولز کتابیں, کاپیاں,یونیفارم سمیت دیگر اشیا سکول سے خریدنے کے پابند کرتے ہیں جبکہ شکایت نمبرز نہ ہونے کی بنا پر والدین محکمہ کو ان معاملات سے آگاہ کرنے سے قاصر ہیں۔