پنجاب فوڈ اتھارٹی کا چنیوٹ میں ملاوٹ کرنیوالوں کیخلاف کریک ڈاؤن

چنیوٹ(نامہ نگار)ڈی جی فوڈ اتھارٹی عاصم جاوید کے حکم پر فوڈ سیفٹی ٹیموں کا ملاوٹ کیخلاف کریک ڈان جاری ہے۔ڈپٹی ڈائریکٹر آپریشنزچنیوٹ ڈاکٹر محمد قاسم رضا نے بتایا کہ رواں سال 19ہزار 771فوڈ پوائنٹس کی چیکنگ اور41مقدمات درج کرائے گئے۔انہوں نے بتایا کہ 2100سے زائد کو ایک کروڑ 63لاکھ 19ہزار کے جرمانے اور 93یونٹ بند کئے گئے ، مارکیٹ میں سپلائی ہونیوالی 364اشیا خورونوش کے سیمپل ٹیسٹ کئے گئے،چیکنگ کیساتھ ساتھ آپریشنز ٹیموں نے 613نئے کاروباروں کو لائسنس بھی جاری کئے۔21ایکڑ پر کاشت سبزیوں کی چیکنگ اور 13 ایکڑ پر گندے پانی سے اگی سبزیاں تلف کی گئیں۔انہوں نے مزید بتایا کہ19 لاکھ 50ہزار لیٹر دودھ کی چیکنگ کرکے 19 ہزار 650 لٹر دودھ تلف،3ہزار 383 کلو ناقص گوشت،2ہزار 535 لیٹر کولڈ ڈرنکس، 1280کلو ایکسپائر اشیا تلف کی گئیں۔ 3400پیکٹ گٹکا، 220 کلو ملاوٹی مصالحہ جات اور 2 من سے زائد ناقص استعمال شدہ آئل تلف کیا گیا۔انہوں نے بتایا کہ گزشتہ سالوں کی نسبت کارروائیوں میں ریکارڈ اضافہ اور دودھ تلف شرح میں واضح کمی آئی ہے۔ چیکنگ کی نسبت دودھ تلف میں ریکارڈ کمی دودھ کے معیاری ہونے کا واضح ثبوت ہے۔انہوں نے کہا کہ خوراک میں ملاوٹ اور جعلسازی کرنے والوں کیخلاف بلاتفریق کارروائیوں کا سلسلہ جاری ہے،خوراک کی حفاظت ہم سب کا قومی فریضہ ہے، چھوٹے بڑے فوڈ پوائنٹس کی چیکنگ جاری ہے۔