پولیس دوبارہ سرگرم ہو گئی

لاہور (بیوروچیف)لاہور میں9مئی2023 کے پرتشدد حملوں اور گھیرا ئوجلا ئوکے واقعات میں ملوث تمام مفرور ملزموں اور اشتہاریوں کی تلاش کے لئے دوبارہ سرگرمی سے کام شروع کر دیا گیا۔ پولیس کے مطابق آپریشنز اور انویسٹی گیشن ٹیموں کو اب تک گرفتار نہ ہونے والے ملزموں کی تلاش کے لئے نئے سرے سے سرگرم کوششوں کے لئے حکم دیا گیا ہے۔ پولیس کا کہنا ہے کہ اب تک کی تحقیقات میں مزید 382 ملزمان کی گرفتاری مطلوب ہے،گرفتار نہ ہونے والے 282 اشتہاریوں کی گرفتاری کے لیے چھاپے مارے جا رہے ہیں۔ واضح رہے کہ چند روز پہلے اسلام آباد میں وفاقی کابینہ کی ایک کمیٹی تشکیل دے کر اسے 9 مئی کے حملوں میں ملوث تمام افراد کو قانون کے مطابق کیفر کردار تک پہنچانے اور ایسے کوئی حملہ مستقبل مین نہ ہونے کو یقینی بنانے کا ٹاسک دیا ہے۔ اس کمیٹی کی تشکیل کے تین دن بعد لاہور سمیت ملک بھر میں 9 مئی کے حملوں میں ملوث ایسے افراد کی گرفتاری کیلئے نئے سرے سے کوششیں شروع کر دی گئی ہیں جنہیں اب تک گرفتار نہیں کیا جا سکا۔پولیس رپورٹ کے مطابق لاہور میں 9 مئی کے واقعات کے 14 مقدمات درج ہوئے،49 مقدمات دیگر سنگین دفعات کے تحت درج ہوئے، 1035 ملزمان دہشت گردی کے مقدمات اور 884 ملزمان دیگر مقدمات میں گرفتار کیے گئے۔ رپورٹ میں بتایا گیا ہے کہ دہشت گردی کے مقدمات میں اب تک جیلوں میں 741 ملزمان جوڈیشل ہوئے، دیگر مقدمات میں 318 ملزمان کو جوڈیشل ریمانڈ پر حوالات میں رکھا گیا، باقی تمام ملزمان ضمانتوں پر ہیں یا مقدمات سے ڈسچارج کر دیے گئے ہیں۔لاہور پولیس نے ان مقدمات میں ابتک گرفتار نہ ہو پانے والے ملزمان کے خلاف کریک ڈائون کا آغاز کیا ہے ۔ لاہور پولیس کے مطابق اب تک کی تحقیقات میں مزید تین سو بیاسی ملزمان کی گرفتاری مطلوب ہے ۔ گرفتار نہ ہونے والے دو سو بیاسی اشتہاریوں کے لیے بھی چھاپے مارے جا رہے ہیں۔