پولیس مقابلہ میں مارا جانیوالا ڈاکو ریکارڈ یافتہ نکلا

فیصل آباد (سٹاف رپورٹر) بٹالہ کالونی کے علاقہ مقبول روڈ سرفراز کالونی کے قریب پولیس مقابلہ میں مارا جانیوالا ڈاکو ریکارڈ یافتہ نکلا جبکہ فرار ہونے والے ڈاکو کی تلاش کیلئے چھاپے مارے جا رہے ہیں۔ پولیس ذرائع کے مطابق گزشتہ روز بٹالہ کالونی اے ایس آئی امتیاز گشت کر رہے تھے کہ حاجی چوک سے مقبول روڈ ڈسپنسری کی طرف جانے والے مشکوک موٹرسائیکل سواروں کو رُکنے کا اشارہ کیا، تو انہوں نے پولیس پارٹی پر فائرنگ کر دی، جوابی فائرنگ کے دوران گولی لگنے سے ایک ڈاکو بری طرح زخمی ہو کر گر پڑا جبکہ اس کا ساتھی موقع سے فرار ہو گیا، تاہم پولیس نے زخمی ڈاکو کو ہسپتال پہنچانے کی کوشش کی لیکن وہ راستے میں ہی دم توڑ گیا، مرنے والے ڈاکو کی شناخت آصف ولد اصغر سکنہ شادی پورہ کے نام سے ہوئی جو کہ پولیس کو متعدد وارداتوں میں مطلوب تھا، تاہم نعش پوسٹ مارٹم کے بعد ورثاء کے حوالے کر دی گئی۔