چینی کا بروکر 3ارب کا فراد کرکے فرار

صادق آباد (نامہ نگار)صادق آباد میں چینی بروکر شہریوں کے ساتھ3ارب سے زائد کا مبینہ فراڈ کرکے فرار ہوگیا۔ صادق آباد میں جنوبی پنجاب کے سب سے بڑے چینی کے بروکر شیخ راشد کا تین ارب سے زائد کا مبینہ فراڈ سامنے آیا ہے، پولیس کے مطابق درجنوں افراد نے شیخ راشد کو چینی سٹاک کرنے کیلئے رقم دی تھی ،پولیس نے شیخ راشد کے سٹورز پر نفری تعینات کرنے کے بعد نیب کو انکوائری کیلئے لیٹر لکھ دیا ۔دوسری جانب صادق آباد کے علاقے جمالدین والی پلی پر چینی کے کاروبار سے منسلک تاجر شیخ راشد کی جانب سے ایک ویڈیو بیان جاری کیا گیا ہے جس میں اس نے پستول دکھاتے ہوئے بتایا کہ اس سے چینی کے کاروبار میں سوا ارب روپے کا نقصان ہوا ہے اور اسے نقصان کے ازالہ کیلئے کچھ وقت دیا جائے، میرے والد اور بھائیوں کو تنگ نہ کیا جائے۔ شیخ راشد کے اعترافی بیان کے بعد کاروباری حلقوں میں تھرتھلی مچ گئی اور انویسٹرز نے تھانہ سٹی کا رخ کیا، درجنوں متاثرین کی درخواستوں کے بعد شیخ راشد کے گوداموں پر پولیس کی نفری تعینات کردی گئی ہے جبکہ ڈی پی او رحیم یار خان نے تحقیقات کے لیے نیب کو خط لکھ دیا ہے۔پولیس نے ابتدائی طور پر شیخ راشد کے دو بھائیوں اور والد کو تحویل میں لے رکھا ہے،متعدد مشتعل متاثرین کی جانب سے شیخ راشد کے بھائی کے گھر پر بھی قبضہ کرنے کی کوشش کی سی سی ٹی وی سامنے آئی جسے ناکام بنا دیا گیا۔