کابینہ کی منظوری کے بغیر چیئرمین نیپرا اور ممبران نے خود تنخواہیں 3گنا بڑھا لیں

اسلام آباد (بیوروچیف) نیشنل الیکٹرک اینڈ پاور ریگولیٹری اتھارٹی (نیپرا) کے اعلیٰ حکام نے وفاقی کابینہ کی لازمی منظوری کے بغیر اپنی تنخواہوں میں3گنا تک اضافہ کردیا ہے رپورٹ کے مطابق یہ اضافہ ایک ایسے وقت میں کیا گیا ہے، جب پاور سیکٹر کو بڑے پیمانے پر تکنیکی، تجارتی اور ڈسٹری بیوشن خسارے کا سامنا ہے۔تمام ریگولیٹری باڈیز کے چیئرپرسن اور ممبران عام طور پر زیادہ سے زیادہ مینجمنٹ پوزیشن (ایم پی) اسکیل ون کے حقدار ہوتے ہیں، جس کی بنیادی تنخواہ 6لاکھ 29ہزار روپے سے لیکر 7لاکھ72 ہزار780روپے ماہانہ ہوتی ہے۔دیگر مراعات، جن میں گھر کا کرایہ ایک لاکھ 46 ہزار سے 2 لاکھ 6 ہزار روپے اور یوٹیلیٹیز کے لیے 35 ہزار روپے شامل ہیں، ان کی مجموعی تنخواہ 8 لاکھ سے 10 لاکھ روپے تک پہنچ جاتی ہے۔ذرائع کے مطابق نیپرا حکام نے اپنے معاوضوں میں تقریبا 3 گنا اضافے کی منظوری دی۔ریگولیٹری باڈی کو 10 فروری کو ایک تفصیلی سوالنامہ بھیجا گیا تھا، جس میں تنخواہوں میں ترمیم اور حکومت کی منظوری طلب کی گئی تھی، لیکن متعدد یاد دہانیوں کے باوجود کوئی جواب نہیں ملا۔چیئرمین نیپرا کی مجموعی تنخواہ 32 لاکھ 50 ہزار روپے اورعہدیداروں کی مجموعی تنخواہ 29 لاکھ 50 ہزار روپے تک پہنچ گئی ہے۔نظر ثانی شدہ معاوضہ پیکج میں 7 لاکھ سے 7 لاکھ 73 ہزار روپے کی بنیادی تنخواہ شامل ہے، علاوہ ازیں نیپرا حکام نے ججز کے جوڈیشل الانس کی طرز پر اپنے لیے ماہانہ 6 لاکھ 31 ہزار سے 7 لاکھ روپے ریگولیٹری الانس کی منظوری دے دی ہے۔انہوں نے 2024 کے لیے 5 لاکھ 87 ہزار روپے سے 6 لاکھ 50 ہزار روپے کا ایڈہاک ریلیف بھی حاصل کیا ہے۔اس کے علاوہ وہ 2023 کے لیے 5 لاکھ 44 ہزار سے 6 لاکھ روپے کی شرح سے ایڈہاک ریلیف کے اہل بھی ہو گئے ہیں۔اس کے علاوہ 2022 کے لیے ایک لاکھ 5 ہزار سے ایک لاکھ 16 ہزار روپے ماہانہ اور 2021 کے لیے 70 ہزار سے 77 ہزار 300 روپے ماہانہ ایڈہاک ریلیف کے طور پر گھر کا کرایہ الانس بھی دیا جائے گا۔ان کی دیگر مراعات میں 96 ہزار روپے اور یوٹیلٹی الانس 32 ہزار سے 35 ہزار روپے شامل ہیں۔ان کی مجموعی تنخواہوں کا پیکج اب 29 لاکھ 50 ہزار روپے سے بڑھ کر 32 لاکھ 50 ہزار روپے تک پہنچ گیا ہے جو اعلی عدالتوں کے ججوں سے بھی زیادہ ہے۔نیپرا ایکٹ 1997 کے سیکشن 8 میں چیئرمین نیپرا اور ممبران کی تنخواہ، مراعات اور مراعات کا ذکر کیا گیا ہے۔اتھارٹی کے چیئرمین اور ممبران ایسے معاوضے اور الانسز کے اہل ہوں گے جو اتھارٹی وفاقی حکومت کی منظوری سے طے کرے گی۔تاہم ذرائع نے بتایا کہ یہ ترامیم حکومت کی منظوری کے بغیر کی گئیں۔نیپرا ایکٹ کے سیکشن 8 میں یہ بھی کہا گیا ہے کہ چیئرپرسن اور ممبران کے معاوضے اور الانسز ان کے کام کی خصوصی نوعیت اور نجی شعبے میں مسابقتی تنخواہوں کی ادائیگی کو یقینی بنائیں گے۔نیپرا کے زیادہ تر ارکان اور چیئرپرسن عام طور پر ریٹائرڈ بیوروکریٹس ہوتے ہیں، جن کی آخری تنخواہ 6 لاکھ سے 7 لاکھ روپے کے درمیان ہوتی ہے۔ اس وقت نیپرا کے چیئرپرسن، کے پی اور بلوچستان سے تعلق رکھنے والے 2 ارکان ریٹائرڈ بیوروکریٹس ہیں۔نظرثانی کے بعد نیپرا کے 4 ارکان اور چیئرپرسن کی مجموعی تنخواہوں میں سرکاری ملازمین کی حیثیت سے ان کی حتمی تنخواہوں سے 4 گنا سے زیادہ کا اضافہ ہوا ہے۔ذرائع کا کہنا ہے کہ نیپرا کے ایک عہدیدار نے موجودہ چیئرپرسن اور اراکین کو قائل کیا کہ ان کے پاس حکومت کی منظوری کے بغیر اپنے معاوضوں میں اضافے کا اختیار ہے۔تنخواہوں میں اس اضافے نے نیپرا اور دیگر ریگولیٹرز کے حکام کے درمیان بھی تضاد پیدا کیا ہے، جنہیں وزارت خزانہ کی جانب سے نوٹیفائیڈ ایم پی اسکیل کے تحت معاوضہ دیا جا رہا تھا۔اس اصول سے مستثنیٰ صرف آئل اینڈ گیس ریگولیٹری اتھارٹی کی چیئرپرسن تھیں، جو اسپیشل پروفیشنل پے اسکیل کے تحت تنخواہ لے رہی تھیں، جس میں زیادہ سے زیادہ معاوضہ 15 لاکھ روپے سے 20 لاکھ روپے کے درمیان تھا۔