کل سے بارشوں کا امکان

لاہور (بیوروچیف) لاہورشہر میں کل سے بارشیں شروع ہونے کا امکان ظاہر کیا گیا ہے جبکہ فضائی آلودگی کی صورتحال بدستور تشویشناک ہے، محکمہ موسمیات کے مطابق موجودہ درجہ حرارت 19ڈگری سینٹی گریڈ ریکارڈ کیا گیا ہے۔محکمہ موسمیات کا کہنا ہے کہ ہوا کی رفتار 2کلو میٹر فی گھنٹہ ریکارڈ کی گئی جبکہ ہوا میں نمی کا تناسب 47فیصد ہے، کل سے شہر میں 30 فیصد تک بارش کا امکان موجود ہے، جس سے موسم میں خوشگوار تبدیلی متوقع ہے۔محکمہ موسمیات نے ملک کے بالائی علاقوں میں فروری کے آخر اور مارچ کے شروع میں ملک کے بالائی علاقوں میں بارش ہونے کا امکان ظاہر کیا ہے۔دوسری جانب فضائی آلودگی میں اضافہ دیکھنے میں آیا ہے، شہر کا مجموعی ایئر کوالٹی انڈیکس (AQI) 267 ریکارڈ کیا گیا، جس کے بعد لاہور آلودہ ترین شہروں کی فہرست میں چوتھے نمبر پر آ گیا ہے۔سی اے پی آر آفس میں AQI کی شرح 288 ریکارڈ کی گئی،ماڈل ٹان میں شرح 257 رہی،ڈی ایچ اے فیز فائیو میں 267 جبکہ سول سیکرٹریٹ میں آلودگی کی شرح 234 نوٹ کی گئی۔ماہرین صحت نے شہریوں کو ہدایت کی ہے کہ غیر ضروری طور پر گھروں سے باہر نکلنے سے گریز کریں، خصوصا بچوں، بزرگوں اور سانس کے امراض میں مبتلا افراد کو احتیاط برتنے کی تاکید کی گئی ہے، طبی ماہرین کے مطابق آلودہ فضا میں زیادہ دیر قیام سانس اور آنکھوں کے امراض کا باعث بن سکتا ہے۔