اسلام آباد(بیوروچیف) گزشتہ دو مالی سالوں میں وفاقی حکومت کی جانب سے49کھرب 75 ارب روپے کا ٹیکس استثنی دیے جانے کا انکشاف ہوا ہے۔ذرائع کے مطا بق مالی سال 24-2023 اور 23-2022میں وفاقی حکومت نے مختلف سیکٹرز کو انکم ٹیکس کی مد میں 10 کھرب22ارب جبکہ سیلز ٹیکس کی مدمیں بڑے سرمایہ داروں کو2757ارب روپے کا ٹیکس استثنی دیا گیا۔کسٹمز ڈیوٹی کی مد میں وفاقی حکومت کی جانب سے دو سالوں میں 1195 ارب روپے، توانائی اور کان کنی کے شعبے میں 103 ارب 47 کروڑ روپے، ہاوسنگ اور پبلک ڈویلپمنٹ اتھارٹیز کو 43 کروڑ 28 لاکھ روپے،تعلیمی شعبے کو 17 ارب، انفارمیشن ٹیکنالوجی کے شعبے میں 5 ارب 86 کروڑ روپے کا استثنی دیا گیا۔اس کے علاوہ صحت اور فارما سیکٹر کو مالی سال 23-2022 اور 24-2023 میں حکومت کی جانب سے 3 ارب 49 کروڑ روپے،کھاد اور زراعت کے شعبوں میں سیلز ٹیکس کی مدمیں 457ارب 92 کروڑ روپے جبکہ پاور جنریشن کمپنیوں کو 5 ارب 77 کروڑ روپے کا سیلز ٹیکس جبکہ صحت اور طبی آلات کے شعبے میں 313ارب 66کروڑ روپے کا ٹیکس استثنیٰ دے دیا گیا۔
