2026ء میں ہونیوالی سرکاری چھٹیوں کا ممکنہ شیڈول

اسلام آباد (بیوروچیف) سال 2026 ء میں ہونے والی سرکاری چھٹیوں کا ممکنہ شیڈول سامنے آ گیا ہے۔ دستیاب معلومات کے مطابق نئے سال کی پہلی عام تعطیل 5 فروری کو یومِ کشمیر کے موقع پر ہوگی۔ اس کے بعد مذہبی تہوار عیدالفطر کی تعطیلات 21 مارچ سے 23 مارچ تک متوقع ہیں, یہ تعطیلات ملک بھر میں ہوں گی۔ اس کے علاوہ یکم مئی کو یومِ مزدور کے موقع پر ملک بھر میں عام تعطیل ہوگی، جبکہ 28 مئی کو یومِ تکبیر کے موقع پر بھی سرکاری چھٹی دی جائے گی۔عیدالاضحی کے موقع پر 27 مئی سے تین روزہ تعطیلات متوقع ہیں، جبکہ اسلامی مہینے محرم الحرام میں 25 اور 26 جون کو عاشورہ محرم کی تعطیلات ہوں گی۔ قومی دنوں کے حوالے سے جشنِ آزادی کے موقع پر 14 اگست کو ملک بھر میں عام تعطیل ہوگی۔ اسی طرح 26 اگست کو عید میلادالنبی کے موقع پر اور 9 نومبر کو یومِ اقبال کے موقع پر بھی سرکاری تعطیل ہوگی۔ سال 2026 میں یومِ قائداعظم اور کرسمس کی تعطیلات بھی شامل ہوں گی، تاہم 26 دسمبر کو صرف مسیحی ملازمین کے لیے چھٹی ہوگی۔