الیکشن کمیشن کی انتخابی مہم کے حوالے سے ہدایات جاری

اسلام آباد(بیوروچیف) الیکشن کمیشن نے انتخابات میں حصہ لینے والے تمام امیدواروں کو اپنی انتخابی مہم 6اور 7فروری کی درمیانی رات ختم کرنے کی ہدایت کی ہے ترجمان الیکشن کمیشن کے مطابق عام انتخابات 2024 میں حصہ لینے والے تمام امیدواران اور سیاسی جماعتوں کو مطلع کرتا ہے کہ الیکشنز ایکٹ 2017 کی سیکشن 182 کے مطابق 6فروری 2024 اور 7فروری 2024 کی درمیانی شب 12بجے کے بعد کوئی بھی شخص کسی بھی جلسے، جلوس، کارنر میٹنگ یا اس نوعیت کی سیاسی سرگرمی کا نہ تو انعقاد کر ے گا اور نہ ہی اس میں شرکت کرے گا۔ لہذا کوئی بھی شخص جو قانون کی مذکورہ بالا شق کی خلاف ورزی کرے گا اس کے خلاف قانونی کارروائی عمل میں لائی جائیگی