کنگنارناوت سے دوستی کیلئے تیار ہوں’ تاپسی پنوں

ممبئی (شوبز نیوز) تاپسی پنوں نے حال ہی میں کنگنا رناوت کے ساتھ اپنے پرانے تنازع پر بات کی، جب تاپسی کو کنگنا کی سستی کاپی کہا گیا تھا۔ اب ان کا کہنا ہے کہ وہ دوستی کے لیے تیار ہیں۔اس حوالے سے گفتگو کرتے ہوئے تاپسی نے کنگنا کے ساتھ کسی بھی جھگڑے کی خبروں کو مسترد کیا اور کہا کہ ان کا کبھی ان سے ٹکرا نہیں ہوا۔ تاہم انہوں نے یہ تسلیم کیا کہ اس دور میں دونوں کے درمیان عوامی نوک جھونک سے کسی نہ کسی کو فائدہ ضرور ہوا ہوگا۔تاپسی پنوں نے ایک یوٹیوب چینل پر گفتگو کرتے ہوئے اس وقت کو یاد کیا جب رنگولی چنڈیل نے انہیں کنگنا کی سستی کاپی کہا تھا۔ انہوں نے کہا کہ چونکہ میں ان کے جتنا پیسہ نہیں کماتی، اس لیے میں سستی ہوں۔ اگر وہ اتنی شاندار اداکارہ ہیں تو مجھے ان کی کاپی کہلانے میں کوئی مسئلہ نہیں۔ آپ میرا کوئی بھی بیان نکال لیں، میں نے ان کے خلاف کچھ نہیں کہا۔تاپسی سے یہ بھی پوچھا گیا کہ فلم انڈسٹری میں اسٹار کڈز کو ترجیح دینے کے معاملے پر انکا اور کنگنا کا موقف مختلف تھا اور ان کے مبینہ جھگڑے سے کسی کو فائدہ ہوا ہوگا یا نہیں۔ اس پر انہوں نے کہا کہ مجھے ان کے بارے میں نہیں معلوم، لیکن کسی نہ کسی کو کسی نہ کسی طرح فائدہ ضرور ہوا ہوگا۔انہوں نے یہ بھی واضح کیا کہ وہ اس معاملے کو ختم کرنے کے لیے تیار ہیں۔ تاپسی نے کہا کہ میں دوستی کے لیے تیار ہوں۔یاد رہے کہ 2020 میں کنگنا اور تاپسی کے درمیان سوشل میڈیا پر کھلی جنگ دیکھنے میں آئی تھی۔