ڈیلس (سپورٹس نیوز) فیفا ورلڈ کپ کے ناک آئوٹ مرحلے میں مصر نے تاریخ رقم کرتے ہوئے آسٹریلیا کو پینالٹی شوٹ آئوٹ میں 2-4 سے شکست دے کر پہلی بار ورلڈ کپ کے ناک آئوٹ مرحلے میں کامیابی حاصل کرلی، جبکہ دفاعی چیمپئن ارجنٹینا نے سخت مزاحمت کرنے والے کیپ ورڈی کو اضافی وقت میں 2-3 سے شکست دے کر پری کوارٹر فائنل میں جگہ بنا لی۔ڈیلس میں کھیلے گئے میچ میں مصر نے 13ویں منٹ میں امام عاشور کے گول کی بدولت برتری حاصل کی، تاہم دوسرے ہاف میں محمد ہانی کے بدقسمت خود گول کے باعث آسٹریلیا نے مقابلہ برابر کردیا۔مقررہ اور اضافی وقت میں مقابلہ 1-1 سے برابر رہنے کے بعد فیصلہ پینالٹی شوٹ آئوٹ پر ہوا، جب مصر نے شاندار کھیل پیش کرتے ہوئے 2-4 سے کامیابی حاصل کی۔محمد صلاح نے اعتماد کے ساتھ پینینکا انداز میں پینالٹی اسکور کی، جبکہ حسام عبدالمجید نے فیصلہ کن پینالٹی پر گول کرکے اپنی ٹیم کو تاریخی فتح دلائی۔یہ مصر کی ورلڈ کپ کی تاریخ میں ناک آئوٹ مرحلے کی پہلی کامیابی ہے، جبکہ وہ آخری 16 مرحلے میں اب ارجنٹینا کا سامنا کرے گا۔مصر کی کامیابی صرف ایک ناک آئوٹ میچ جیتنے تک محدود نہیں بلکہ یہ افریقی فٹبال کے لیے بھی ایک تاریخی لمحہ ہے۔ محمد صلاح نے اگرچہ پورے میچ میں روایتی جارحانہ کھیل پیش نہیں کیا، تاہم فیصلہ کن لمحات میں اپنی قیادت اور تجربے کا بھرپور مظاہرہ کیا۔دوسری جانب میامی میں کھیلے گئے مقابلے میں عالمی نمبر 2 اور دفاعی چیمپئن ارجنٹینا کو عالمی درجہ بندی میں 64ویں نمبر پر موجود کیپ ورڈی کے خلاف غیرمتوقع سخت مقابلے کا سامنا کرنا پڑا۔لیونل میسی نے 29ویں منٹ میں خوبصورت گول کرکے ارجنٹینا کو برتری دلائی، لیکن ڈیرائے ڈوارٹے نے دوسرے ہاف میں گول کرکے مقابلہ برابر کردیا۔اضافی وقت کے آغاز میں لیساندرو مارٹینیز نے ارجنٹینا کو دوبارہ برتری دلائی، مگر سڈنی لوپس کابرال نے شاندار کرلنگ شاٹ کے ذریعے ایک بار پھر مقابلہ 2-2 سے برابر کردیا۔بالآخر 111ویں منٹ میں کرسٹیان رومیرو کے ہیڈر پر ڈائنی بورجز کے بدقسمت خود گول نے ارجنٹینا کو 2-3 کی فتح دلا دی۔ارجنٹینا نے اگرچہ اگلے مرحلے میں جگہ بنا لی، لیکن کیپ ورڈی کے خلاف اس کی کارکردگی کئی سوالات چھوڑ گئی۔ عالمی چیمپئن ٹیم کو نسبتا کمزور حریف کے خلاف اضافی وقت تک جدوجہد کرنا پڑی۔دوسری جانب ورلڈ کپ میں پہلی بار ناک آئوٹ مرحلہ کھیلنے والی کیپ ورڈی نے بے خوف اور جارحانہ فٹبال کھیل کر دنیا بھر کے شائقین کی توجہ حاصل کی۔اب مصر اور ارجنٹینا کے درمیان ہونے والا پری کوارٹر فائنل صرف محمد صلاح اور لیونل میسی کی انفرادی صلاحیتوں ہی نہیں بلکہ دونوں ٹیموں کے اعصاب، حکمت عملی اور دفاعی مضبوطی کا بھی سخت امتحان ہوگا۔
