PTI حکومت نے ہسپتالوں کو انتقامی سیاست کانشانہ بنایا ‘ شہباز شریف

ملتان(نامہ نگار)وزیرِاعظم نے ملتان میں علاج معالجے کی بین الاقوامی سہولیات سے آراستہ زیر تعمیر نشتر 2 ہسپتال کا دورہ کیا اور جاری تعمیراتی کاموں کا جائزہ لیا۔وزیرِاعظم نے اس موقع پر گفتگو کرتے ہوئے کہا کہ پچھلی حکومت نے چور ڈاکو کی گردان کے سوا کوئی کام نہ کیا۔جو لوگ چیئرمین پی ٹی آئی کو کندھوں پر بٹھا کر لائے تھے، وہ ان کی حکومت سے یہ ہسپتال مکمل کرواتے، مگر اس کے بعد جو ہوا وہ تاریخ ہے،انہوں نے کہا کہ پی ٹی آئی حکومت نے 4 سال ہسپتال کو فنڈز جاری نہ کرکے بربادی کی، گزشتہ 4 سال شدید غفلت برتی گئی، جس کی جتنی مذمت کی جائے کم ہے،پی ٹی آئی حکومت میں انتقامی سیاست کی وجہ سے انسانی خدمت کو روکا گیا۔شہباز شریف کا کہنا تھا کہ لوگ علاج نہ ملنے سے قبر میں جارہے ہوں اور یہاں سیاست ہورہی ہے، اس سے زیادہ قبیح حرکت نہیں ہوسکتی، چیئرمین پی ٹی آئی کی حکومت میں ہوتے ہوئے چور ڈاکو کی گردان ختم نہیں ہوتی تھی، ان کے پاس کھربوں روپے تھے، لیکن ٹانگ پر ٹانگ رکھے بیٹھے رکھے، انہیں اس سے وقت ملتا تو ہسپتال بناتے۔