افغان لڑکا طیارے کے لینڈنگ گیئر میں چھپ کر دہلی پہنچ گیا

دہلی (مانیٹرنگ ڈیسک) افغانستان سے تعلق رکھنے والا13سالہ لڑکا گذشتہ روز کی صبح طیارے کے لینڈنگ گیئر میں چھپ کر دہلی پہنچ گیا جس سے بھارتی حکام کی تشویش میں اضافہ ہو گیا۔ رپورٹ کے مطابق افغان لڑکے نے کابل سے دہلی آنے والی پرواز کے لینڈنگ گیئر کے کمپارٹمنٹ میں چھپ کر سفر کیا۔بھارتی میڈیا کے مطابق یہ لڑکا کابل ایئرپورٹ کے ممنوعہ علاقے میں داخل ہونے میں کامیاب ہو گیا اور افغان ائیرلاین KAM کی پرواز RQ-4401کے پچھلے مرکزی لینڈنگ گیئر کمپارٹمنٹ میں چھپ گیا۔ یہ پرواز تقریبا دو گھنٹے کے سفر کے بعد صبح 11بجے دہلی پہنچی تھی۔طیارے کے عملے نے لڑکے کو لینڈنگ کے بعد ہوائی جہاز کے قریب گھومتے ہوئے دیکھا، جس پر ایئرپورٹ سیکیورٹی کو فوری طور پر اطلاع دی گئی۔یہ لڑکا شمالی افغانستان کے شہر قندوز کا رہائشی ہے جسے ایئرلائن کے عملے نے تحویل میں لیا اور سینٹرل انڈسٹریل سیکیورٹی فورس (CISF)کے حوالے کر دیا، جس کے بعد اسے پوچھ گچھ کے لیے ٹرمینل 3 لے جایا گیا۔بھارتی خبر رساں ایجنسی پی ٹی آئی کے مطابق ابتدائی تفتیش کے دوران، لڑکے نے دعوی کیا کہ اس نے طیارے میں محض تجسس کے باعث داخلہ لیا اور اسے اس اقدام کے نتائج کا مکمل ادراک نہیں تھا۔حکام نے تصدیق کی کہ اسے اسی طیارے کے ذریعے واپس افغانستان بھیج دیا گیا، جو اتوار کو دوپہر 12:30 بجے دہلی سے روانہ ہوا تھا۔افغان ایئرلائن کی سیکیورٹی ٹیم نے طیارے کے لینڈنگ گیئر کمپارٹمنٹ کا مکمل معائنہ کیا، جس دوران ایک چھوٹا سا سرخ اسپیکر ملا، جو غالبا اس لڑکے کی ملکیت تھا۔حکام کے مطابق، تخریبی کارروائیوں کے خدشات کو مدنظر رکھتے ہوئے مکمل جانچ کے بعد طیارے کو محفوظ قرار دے دیا گیا۔