سرگودھا میں14ارب کے میگا سیوریج منصوبے پر عملی کام کا آغاز

سرگودہا(بیوروچیف) وزیر اعلیٰ پنجاب مریم نواز شریف کی خصوصی ہدایت پر سرگودھا شہر کے دیرینہ سیوریج مسائل کے حل کے لیے 14 ارب روپے کے میگا سیوریج پراجیکٹ پر عملی کام کا باقاعدہ آغاز ہو گیا ہے۔ اس سلسلے میں کمشنر سرگودھا ڈویژن جہانزیب اعوان نے ڈپٹی کمشنر کیپٹن (ر) محمد وسیم کے ہمراہ سلانوالی روڈ ڈسپوزل، کمپنی باغ اور جناح کالونی میں تین مختلف مقامات کا دورہ کیا اور منصوبے کے حوالے سے تفصیلی بریفنگ لی۔ دورے کے موقع پر ایم ڈی واسا ابوبکر عمر، ایم ڈی پارکس اینڈ ہارٹیکلچر اتھارٹی محمد ارشد، ڈائریکٹر ڈویلپمنٹ بلال حسن، سی او ایم سی ماجد بن احمد، ڈپٹی ڈائریکٹر ڈویلپمنٹ مہتاب یاسین اور متعلقہ افسران بھی موجود تھے۔ بریفنگ میں بتایا گیا کہ یہ منصوبہ 20 ماہ میں مکمل کیا جائے گا جس کے تحت شہر بھر میں 6 لاکھ فٹ نئی سیوریج لائن بچھائی جائے گی جو مجموعی طور پر تقریباً 180 کلومیٹر بنتی ہے۔ بارش کے پانی کو محفوظ کرنے کے لیے کمپنی باغ، بلاک نمبر 31 اور رحمت العالمین پارک میں تین جدید سٹوریج ٹینکس تعمیر کیے جائیں گے، جہاں سے بعد ازاں پی ایچ اے پانی حاصل کرے گا۔ شہر کے موجودہ 14 ڈسپوزلز میں سے 7 کو ختم کر کے 2 نئے ڈسپوزل تعمیر کیے جائیں گے۔ اس طرح مجموعی طور پر 9 جدید ڈسپوزلز کے ذریعے شہر کا سیوریج سسٹم چلایا جائے گا۔ ہر سٹوریج ٹینک میں 10 سے 15 لاکھ گیلن پانی ذخیرہ کرنے کی گنجائش ہو گی۔ منصوبے کے تحت 72 انچ سے 12 انچ تک کے جدید سیوریج پائپ بچھائے جائیں گے۔ شہر کو دو زونز میں تقسیم کر کے مرحلہ وار کام شروع کر دیا گیا ہے۔کمشنر سرگودھا جہانزیب اعوان نے کہا کہ یہ منصوبہ سرگودھا کے لیے ایک گیم چینجر ثابت ہو گا اور کئی دہائیوں سے چلے آ رہے سیوریج مسائل کا مستقل حل ممکن ہو سکے گا۔ انہوں نے واضح کیا کہ کام کے معیار اور شفافیت پر کوئی سمجھوتہ نہیں کیا جائے گا۔ڈپٹی کمشنر کیپٹن (ر) محمد وسیم نے کہا کہ ضلعی انتظامیہ منصوبے کی بروقت تکمیل کے لیے تمام وسائل استعمال کر رہی ہے اور روزانہ کی بنیاد پر مانیٹرنگ کی جا رہی ہے۔