مریم نواز کا رمضان ریلیف پیکیج کی تقسیم کا جائزہ

لاہور (بیوروچیف) وزیراعلی پنجاب مریم نواز شریف رمضان نگہبان ریلیف پیکیج کی تقسیم کی نگرانی کے لئے عوام کے پاس پہنچ گئیں ۔وزیراعلیٰ مریم نواز شریف نے لاہور کے مختلف علاقوں کے دورے کئے او رگھر گھر جا کر شہریو ں سے بات چیت کی۔وزیراعلیٰ مریم نوازشریف بزرگ خواتین سے گلے ملیں،بزرگوں اورمائوں نے مریم نوازشریف کو ڈھیروں دعائیں دیں ۔وزیراعلیٰ مریم نوازشریف نے دستک دی اور اجازت لیکر گھر کے اندر داخل ہوئیں اور سب لوگوں سے ملیں۔ وزیراعلیٰ خاتون خانہ کے ساتھ صحن میں بچھی چار پائی پر بیٹھ گئیں ۔وزیراعلیٰ گھر کی خواتین کے ساتھ گھل مل گئیں او ربات چیت کی۔وزیراعلیٰ مریم نوازشریف نے کمسن بچے کو پیار کیا اور اس کا نام پوچھا۔ وزیراعلیٰ مریم نواز نے چھوٹے سے بچے کو گود اٹھا لیااور اس کے گال پر پیار کیا، ننھا بچہ وزیراعلیٰ کے ساتھ کھیلتا رہا۔وزیراعلی مریم نواز شریف نے بچے کا نام سن کر بتایا کہ میرے نواسے کا نام بھی محمد ہے۔ وزیراعلیٰ مریم نوازشریف نے گھر گھر جا کر شہریو ں سے بات چیت کی اوررمضان نگہبان پیکیج میں شامل سامان کے معیار ،ترسیل او رعملے کے رویے کے بارے میں دریافت کیا۔گھریلو خواتین وزیراعلیٰ سے بات چیت کرتے ہوئے اپنے مسائل کے بارے میں بتاتی رہیں۔وزیراعلیٰ مریم نوازشریف کنگ ایڈورڈ یونیورسٹی میں بی ایس کرنے والی طالبہ سے مل کر بہت خوش ہوئیں۔ وزیراعلیٰ مریم نوازشریف نے کہاکہ آپ کی خادمہ ہوں ، اس لئے خود معلوم کرنے نکلی ہوں کہ آپ کو آپ کا حق مل بھی رہاہے یا نہیں۔آپ کی دعائوں سے ہی خدمت کے مشن میں کامیاب ہوںگی۔ خواتین ، بچے اور شہری وزیراعلیٰ مریم نوازشریف کو اپنے درمیان دیکھ کر خوشگوار حیرت میں مبتلا ہوگئے۔